Oprah Winfrey-i tweet ka yok; sen million 12 aazük

Washington, January 27 (Agencies): Nüngtugu America tsür, Oprah Winfrey-i tweet ka yokba sülen dollar sen million 12 tashi aazükba osang ka E!Online-i metetdaktsüogo.
“‘Journey to Beloved’ kaket zülula, Oprah-i amsang chiaka la temang tebongbaba akümba osang ka Twitter ajanga sangdongba sülen lai sen million 12 tashi aazükogo,” ta Market Watch-ia osang jangjashitsü.
Arishi küm 61 tain Oprah-i lar tweet den külemi, Weight Watchers tentet jenjang tamaba küma ajungkettsütsü second 30 talang video ka yokba osang jangjaogo.
Oprah-i lar tweet yoker ghonda 1 shi süir külen Weight Watcher tentet indang shishilembatsü share ka nung sen dollar 2 dak tema aküm aser iba yongji share million 6 tashi alizüka alila, Oprah-i sen million 12 shi tajangzük angu.