Sunday School koda tongtibang !

– P Yanglu Lkr, Signal Basti, Dimapur.

Küm shia Ao Baptist Arogo Mongdangi alima ajunga Sunday School anogomong sentong asoshi onük tapet tajung bushia Arogotem nung Sunday School tsütsü nübor tali tangatetba akatsü asoshi jembidaktsür. Item onüktem rongnung : Arogo nung Sunday Schoolji Missionary Ensem: ta asüba onük indang tatsü agi shilem 4 küma lemsar, ni angatetba Tir Yimyim azüngertem den lemsateper.
1. Sunday School Ratet
2. Sunday School Arogo ketdangsütsü
3. Sunday School tsürabur teinyaktsü
4. Sunday School süngjang
A”- Ensem:- Ki koba nung yin oset yanglur, iba dang Ensem ki ta ajar. Yangi mapa inyaktsü asoshi tongtipang oset terok nundaker itemji (1) yin (2) matrol (3) mijang (4) mipong (5) tzü (6) yintsünger. Item ajanga inyaka yin agi kechi oset yanglua aginür, aji yanglua amshitsü akok.
Arogo tsütsü reprangdangra ‘Ensem’ ta asübaji Arogo nung Sunday School department den medemdanga amshitsü kanga peta lir aser yangji aliba Hadirtemji Sunday School department nung sendakba tenük telentem ta bilemtsü akok. Ensem mapa inyaktsü asoshi ki ka nüngdak, koba aküm nung sademsadema yintsüngri mapa inyaker. Ensem kiji Arogo tatishitsü küma amshidi aser Arogo nung tongtipang departmentji Deobar School ta rajemdi. Arogo tamendakdakji kibong aser tekoklakji ‘Khrista’ ta asenoki meteta yudi.
Ensem ki aser iba nung akaba oset tapu balala ratet yamai agid i:-
1. Yin : Yin tazü (raw) mashi ka bena arua oset tajung küma yangluba (tsungtetba) ama, Arogo nung aliba tanur-tem chiyongtsü metetba dak alema kecha memetet aliba anidena Deobar School nung tesayurtemi pie oshi, alima shisatsü, sobaliba aser Tsüngrem metetba shisatsü agüja, kechisarena ajak nung tabensa/ tetemsü nisung ka küma yanglutsür.
2. Matrol (Hammer): Ensem ki nung matrolji ajak dang tongtipangtiba oset ka lir koba agi yin tulu,. tila tajung, majung ajak akosa merang dak jaloka aliba hong (rust) ajak akhodoka endoker oset tajung yanglua agir. Iba ya Arogo nung Deobar School ajanga tanur ka pei aotsü lenmang shitak teyua alima shisatsü aser Tsüngrem o angatetdakja tanur ka yanglutsüba lir.
3. Mijang/ Mi : Mijang aser mi koba agi yin temerangtibaji rongsa aseni aginüba oset tajung yangluteter, mijang aser miji Deobar School nung Tsüngrem o ji lir. Yangi tanur küm aser class tasazük apur class lemsar mendaktsür, Class shia küm asem course agir- 1st year, 2nd year, 3rd year, Beginner küm 4-6, tashi nung küm 3 course aser yamaji agiyonga aotsü. Primary küm 7-9, Junior 10-12, Intermediate küm 13-15 aser Senior Class küm 16-18, küm aser class lemsaba amaji parnoki angatetttsüsa Tsüngrem O tatongi sayuba ajanga parnok dak aketba yimya tamajung ajak endoka melenshir, tanurtem Tsüngrem meteta tim lenmang nung intetdaktsür.
4) Mipong : lba yagi mi tali,tali jangrutsü asoshi mopong agütsür aser yinji shidak küma rongdaktsür aser oset kechi koma yangluner yamaji yangluteter. lba ya Deobar sku1 nung Temeshi tanelai lanurtem mulongjang nung mapa inyakba den saku. Tesayuri Tsüngrem o junga sayuaka temeshi tanelai temaba nungi tangatetba magütsüra, tanurtem taküm nung temelenshi makatsüa akok, saka tanelai tanurtem mulungjang nung kongshia mapa inyakba ajanga, deobar skuli aor tanurtem alima shisatsü aser tanela nung pei nükjidong tajung tongteter. Item tanurtem ajanga Arogo nung SS akaba tajangzük lir ta alimai meteta akümer.
5) Tzü :  Yin agi oset tagitsü küma yanglur tsüktsüka merema rur alibaji Tzü nung meremra osetji topur junga yangluaka tagitsü majung asür saka tzü junga agütsüra tagitsü tajung aser topura tajungba ta asür. Arogo nung SS tesayuri Lai o tatong tenok tenoka rateta sayuba ajanga SS nung küm 18 course Beginner nungi Senior class tashi shitak class-I oa Tsüngrem o angazükertemji Tsüngrem o nung mongin akümer aser tangar dang nungi balaka jokteta mapa yimya, awashi aser Tsüngrem metetba nung tajungba angutsü.
6. Yintsünger : Arogo nung SS tesayurtemji yintsünger ka mesük, kibong nung kodanga Tsüngrem o mangashidangba tanurtem adenshidak, SS tesayuri ajemalua Tsüngrem o tejangja anepalua sayuba ajanga tanurtem kenyongi balaka temelenshiba nung ainer aser parnoki lokti mapa balala nung tongtipang nisung akümer. Arogo nung SS tesayurtemji alima nung tanela anir aruba nung tongtipang shilem agir tajungtiba aser tulutiba, kechiaser asenoki makokba aser meinyaktetba asen jabaso-jalatem Tsüngrem o agi azüoktsür aser mapa ajak asoshi tetemsü aser tapet nisung kümdaktsür. Anungji asenoki parnok dang peladi aser tetushi agütsüdi.
B. Sunday School Tsütsü Arogo ketdangsüba:-
1. Tesayur tabensa mapang shidak nung bushia mapang shidak nung tenzükdaktsütsüla.
2. Arogo SS Course kum 18 shidak tanurtem nem agütsütsüla.
3. Mapang shia tanur tajangzük angutsü akokba noksa aser kaket tasen balala agütsütsüla.
4. Mapang shia Arogo lenirtemi SS semdanga tajungshi o tajung ashitsüla.
5. Tanurtem nem mapang shia mapa tasen kar nunglokja inyakdaktsütsü akok.
6. Chiyongtsü tilateri süaka agüja tanurtem peladaktsütsüla.
7. Tsüngrem O toktepba bushitsü lenmang lapoktsütsüla.
8. SS class-i methitemi aruba aser mark tajung angur asoshi tenüngsang tetushi peria agütsütsüla.
9. Annual meet lia pelatepa küm temdaktsütsüla.
Arogo item mapa nendaka inyakba ajanga tanurtem SSi aotsü jangradaktsür aser Tsüngrem o agi azüoka tanüla nung indaktsür.
C. SS Tsütsü tsürabur teinyaktsü kar :-
1. Deobar anepdang tsüraburtemi mapang shidak nung tanurtem nem anepalua süngo tajung jemdaktsür topur junga renemer pelashishia SS-i yoktsüla.
2. Teti tanurtem SS-i aotsü ajungshitsüla.
3. Teti tenla bener yok tajungba.
4. SS-i aotsü yimya süpadaktsütsüla.
5. Lanur tasoba anogo tenjira tesayur nem sarasadem onük den medemer den lemsateptsü asoshi metai etc bener yoktsüla.
6. Tanur nem SS-i aoba tajangzük junga angatetdaktsütsüla.
7. Tsüraburtemi tanurtem SS-i aoba tajangzük ali mali metettsü merangtsüla.
Arogo aser tsüraburtemi tanurtem dang sayu o tajung shia rongsen lenmang nung yaria oset aser chiyongtsü balala mapang shia agüja peladaktsüba ajanga tanurtem SS-i aotsü mulongtetdaktsür, parnok küm 18 SS course ajak tema class balala nung adenba ajanga Laishiba Lipok kaket nungi Jungkai Adok tashi Tsüngrem o tarok ajak teratet keta angazüker. Parnok laishir mesüaka alima shisatsü aser tanüla nung mongin akümer aser pei nükjidong tongtetter. Anungji tanurtem SS nung teti temulung aguja tendaktsütsü asoshi Arogo aser tsurabur sarasadem khuret abentsüla.
Tsuraburi kibong nung tanurtem dang Tsüngrem o sayutsü mapang magütsütetter, ano tangatetba aser tejangraba maliba tsürabur aika lir, tanurtem tanüla jenjang nung tangar memenepbaji kibong nung tsürabur dak keta lir. Pei dak tangatetba malibayong tanurtem SS-i odakja Tsüngrem o angazükdaktsüdi ta mebilemteter. Pei chirtem tangar ajak dang tajungba sudaktsüner/kümdaktsüner saka tazüokba makai züzüa toktsür. Idangji asen chirtem mulongjang aser shisatsü ajak mojing sülen ojen odagi. Luk 8:5-6-i ashiba ama, ayi-rongji nür kibong aser metsüji nür chirtem mesük, Mth 25:25-30 mori ka agizükba kilirji nür kibong mesük. Ezekil 33:6 Mitkarji nur kibong, nur jabaso-jala tem temenen nung samadaktsüba azüji na, nür kibong tang nungi akangtsü.
Pei kidang tashi manga ama züngshir tanur to SS class nungbo temulong o aser Tsüngrem o tangar dang tama angazüka langzüteter, ken ten menü nung kanga temulong agütsür, kodang otsü tajung ashir item tanur pei tenük nungi nüktsü yima angar, pei kiyong nungbo tanur tamajung tashi manga ta jembir saka SS nungbo ajak dang tajungba ta tanur aika ngua ajurua aruogo. Aji teimba ka kibong nung Tsüngrem o nung mazüokba ajanga adoker. Lanurtem koma ka mejungi liaka tesayuri koba lenmang agi azüoka SS-i arua Tsüngrem o junga angazüdaktsütsü ta nükchidong yur sarasadema sayutsü merangdang tsuraburtemi zuzua pei chir ajungtsü bilema masu saka kidang meinprong masütsü asoshi tenüng agi tanurtem SS-i yoker. Ano tsurabur kari-bo Deobar arura tanur asoshi ki mapa tali adokja, tanepbo SS-i tou ta mesüzüker, iba jagi tanur SS-i aotsü azumasen tendaktsür, SS class nung matenba atema temerenshi mesüra takang kecha maka saka tangar metetba Tsüngrem o memetet akümer. Aji agi tanurtem tejangraba samar ta tsüraburtemi rajemtsüla. Tesayurtemi pei juli nungi rongsen endoka sentong balala yanglua tanurtem SS-i teti arudaktsütsü merangdang, kibong nung tsüraburi tanur SS-i maotsü songtemer, Loli tezü junga meidaktsütsü asoshi nisungi tema nung ali tajung aser tzü agüja anepaludang telonglen tera (root) mesen agi chir südaktsü ama, arogoi küm shia sentong tajung aika yanglua tanurtem SS-i jangra arudaktsütsü ajungshidang kibongtem ajanga aji tamakok ngudaktsür. Mth 19:14, tanurtem ku dangi arudakjanga parnok tesongtem, SS-ji tanurtem asoshi Khrista ajurudak tesem ka ta tsuraburi tali metetsüla. Lk 6:45-48, jagi nür kibong kong amendaka lir ta asüngdanger. Tsüngremi nür nem ketdangsütsü asoshi moatsüba tanurtem tarutsü jenjang koba tashi ka renemtsüdar? Nür kibong tamendakdakji longma asu ? Lisem li nung ?

(Maneni taruba adok nung…)