Japan-i mezüngbuba Stealth Fighter Jet tayimtsü sayaogo

Komaki, January 28 (Agencies): Japan-i radar aser iba amala tendangtsü osettsüset agi meputetba stealth fighter jet tayimtsü mezüngbuba tanü Brehostibar nü sayaogo.

Par linük nung tan mezüngsüa yangluba X-2 fighter jet tayimtsüji Japan tiyongtsülen Komaki yimti anasa tentetba tayimtsü anendak Japan’er defence ministry-i tanü saya liasü.

Tanü sayaba tayimtsü ya taruba February ita tatembangsü anüng nung tendanga yimdaktsüba sülen sangküm 2017 küm March ita tashi nung Japan Defence Ministry nem agütsütsü sentong renema lir.

Mitsubishi Heavy Industries (MHI)-i yangluba X-2 tayimtsü ya meter 14.2 talang aser meter 9.1 tulu lir aser iba tayimtsü ya US den aroki lungjemer yangluba F-2 fighter jet tayimtsü melena amshitsü nükjidong nung yangluogo.

Tanü tashi nung US, Russia aser China linüktemi dang nisungi aniba stealth fighter jet tayimtsü yanglua amshiba osang bushiteta lir.

Japan-i dollar sen million 332 tashi indokba tan tayimtsü tasenji yangluba osanga angazükogo.

MHI telokisa Japan nung mezüngsüa nüburtem anir senzüba jet tayimtsü yaküm November ita yangluba osang jangjaogo.