Pakistan nunger Kohli sapur ka küm 10 tepoukdaki yoker

Lahore (Pakistan), January 28 (Agencies): India nunger batsman, Virak Kohli kanga sapur Pakistan nunger kati Punjab Province nung par ki tema nung India nunger wako asongba atema tepoukdaki küm 10 yokogo.
Arishi küm 22 Umar Draz ya Punjab Province, Okara district nungi sü arrür ka lir, aser yashi pa district court ka matsüngdagi anir aoba sülen tepoukdaki yokogo.
India nunger Republic Day anogomung, January 26 nü Cricket T20 asaya ka nung India-i Australia nunger akok aser iba asaya nung Kohli-i run 90 yanglua liasü, iba anogo nung Pakistan nunger Draz-i tepela nung India wako asong.
Police-i Draz’er ki mita aoba sülen Pakistan Penal Code kübok section 123-A ken o ka benoka liasü.
Section 123-A (Linük yimsüsüba raksatsüba) indang maximum temerenshiji küm 10 tepoukdak ayutsü mesüra senchi achitsü, mesüra temerenshi anaprong agütsütsü.
Draz-i obendanger dang, tanga kecha masü saka pai Kohli meimba ajanga Indian wako asong, ta ashi.
Tamalen osangbenertem den jembidang Draz-i, “Ni ya Virat Kohli kanga sapur ka lir. Kohli ajanga ni Indian team pusem. Ozü ki kolak nung India wako asongbaji ajanga India nunger cricket asayar dang kü temeim dang sayu,” ta ashi.
Paisa ashiba agi, pai aibelen ka inyak ta pai memeteti liasü aser paji India nunger cricket asayar ka sapur dang ta züngshitsüla ta shia pai ketdangsertem dang tai atoktsü mepishi.
Par ki jara nunga Kohli noksa liasü aser police-i India wako aser Kohli noksa naprong bener ao.