Geneva nung Syria yimjung senden amener

Geneva, January 29 (Agencies): United Nations (UN)-i ayonger külen Switzerland kübok Geneva yimti nung Syria yimjung senden tanü, Hokolbar nü nungi amen tenzükogo.
“Syria Tir, Bashar al-Assad-i aniba Syria sorkar telok den ajurutepa senden amenba sülen maneni sorkar anemer teloktem dena senden amentsü renema lir,” ta tanü senden amenba jakdang UN’er Syria envoy, Staffan de Mistura-i metetdaktsü.
Taoba küm 5 tejaklen nungi tenzüka Syria sorkar aser sorkar anemer na tsüngda mangatettep tulu adoka raratepbaren anenja par linük nung yimji yimjung lidaktsütsü nükjidong nung tan senden ya ayonga amener lir.
Tanü senden nung shilem agitsü asoshi Syria’er UN envoy, Bashar al-Jaafari-i aniba Syria sorkar teloka Geneva tonga aoba osang jangjaogo.
Ajisüaka, teloktep Syria sorkar anemer telok tongti, High Negotiations Committee (HNC)-i tan senden nung shilem agitsü mesüra magitsü telemtetba tanü tashi magiteti aliba osang jangjaogo.
HNC-i tan senden nung shilem agitsü osang tejangja memetetdaktsüi liaka, tanüngba sorkar anemer teloktemi tan senden nung shilem agitsü renemba osang metetdaktsüogo.