Tanur tepseter ajunga merenshitsü: Sharif

Islamabad, January 29 (Agencies): Kaket reju balala nung azünger tanurtem tepseter ajunga nem ozüngi melaba ama tapet temerenshi agütsütsü tenangzükba olen ka Pakistan Ato Kilonser, Nawaz Sharif-i tanü, Hokolbar nü metetdaktsüogo.
Pakistan linük nung tensa azüoktsü maparen aser rongsenren jenjang reprangshitsü senden ka tanü Islamabad nung ayonga amenba sülen osangbener den ajurutepdang pai iba olenji metetdaktsü.
Kiralongrartemi Charsadda kübok tentetba Bacha Khan University nung tan January ita 20 nü lendong kanga sashia atalokdakja kaketshir timba densema, nisung 21 tashi tepsetba aser iba den sentakba bushisüngdang agiba osanga ketdangsertemi tanü senden nung benoka liasü.
Taoba mapang lemtetba ama, Pakistan nung tentetba kiralongrar ajunga meshi meshia mesamatsü tashi Pakistan sorkari kiralongrar anema raratsü telemtetba tanü agishia liasü.
“Kaket reju balala nung azünger kaketshirtem anema tebang agi mejembitetba lendong atalokdaktsür aser iba amala lendong atalokdaktsütsü lenmang lapoktsür ajunga ozüngi melaba ama merenshitsü nangzüker,” ta Sharif-i nenshia ashi.
Paisa ashiba agi, Pakistan ajunga nung kiralongrartem samatsütsüji Pakistan sorkar aser nübur naprongla indang arok alizüng lir.
“Pakistan mitkartemi ‘Zarb-e-Azb’ ta ajaba kiralongrar aser telungpur mita arishitsü mapatong inyakba ajanga kiralongrar aser telungpurtem tashi meitdaktsüi kümogo,” ta shia, Pakistan kiralongrartem nem kodanga mekokdaktsütsü tenangzükba olen ka Sharif-i tanü senden nung sangoktsü.
Ano, pai tawa Saudi Arabia, Iran aser Switzerland kübok Davos jila semdangba osanga Sharif-i tanü senden nung lemsatepa liasü.
Tanü senden nung Pakistan Defence Minister, Khawaja Asif; Finance Minister Ishaq Dar aser Interior Minister, Chaudhry Nisar Ali Khan nungeria shilem agia liasü.
Ano külen, Afghanistan mitkar lenir, General Raheel-i Pakistan semdangtsü aser Afghanistan den sentakba onüka tanü senden nung benokba osang jangjaogo.
Afghanistan Tir, Ashraf Ghani-i tan January ita tetenzüklen Islamabad semdanga Heart of Asia Conference nung shilem agiba sülen Pakistan aser Afghanistan na tsüngda tesendaktep taoba mapang nungi tang tajungba akümba osang bushiteta lir.