Gogoi-i NEIIPP 2007 osang tai agütsüba atema Sitharaman-i aitsü

Guwahati, January 29 (Agencies): Assam chief minister Tarun Gogoi-i UPA yimsüsüba mapang nungi tenzükba North East Industrial & Investment Promotion Policy (NEIIPP) 2007 anena ataba indang osang tai agütsüba atema Union minister of state for commerce & industry, Sitharaman-i aija jembiogo.
State BJP party-i ayonga amungba Assam Nirman conclave sentong nung jembiba mapang Sitharaman-i, NEIIPP ajanga lenmang aisü nung teyari agütsür, ta ashi.
Lai, “NEIIPP scheme ajanga industry balala nungi benokba teinyaktsütem tenokdangba makai agizüker,” ta ashi. NEIIPP atema senotsü kanga ajema lemzükja lir, ta laisa shisem.
“NEIIPP atema 11buba ‘five year plan’ inyakyim asoshi sen crore 700 ang lemzükja lir,” ta lai ashi.
Union minister-i ashiba agi, NEIPP ajanga terenlok saku magütsür ajisüaka cement industry tsütsü ang terenok tali agüja arur.
“Anungji iba scheme mapa tasen atema tanaben metenzükdang kanga shisa ka-a lemsatsü tebilemba alitsü nüngdak,” ta lai ashi.
Tarutsü nung union finance ministry-i Northeast atema industry scheme tasen ka tenzüktsü sentong lir aser iba atema senotsüji DoNER ministry meyong Non Lapsable Central Pool of Resources (NLCPR) ajanga lemzüktsütsü, ta Sitharaman-i metetdaktsü.
State nung yimsü tesüdak party Congress-i NEIIPP kübok inyakyim tasen benokba ajak sota lir.
“Asenoki nüburtem libaliro aser sensakertem asoshi jenjang tajungba küma yanglutsütsüla, ta laisa ashi.