Tanurtem tatidang atonger

Nagaland Board of School Education (NBSE) kübok aliba school-tem nung azünger class 10 aser 12 purtem tatidang agitsü asoshi joko ano ter dang anünga lir. Iba tatidang ya class 10 purtem February 10 nungi tenzüktsü aser class 12 purtem February 12 nungi tenzüktsü. Atangji, kaketshidaki aortem asoshi class A nungi tenzüka class ajakji tongtibang, anungji tatidang agiba ajakji kasasa tongtibang asütsü. Ajisüaka, züngyonga tur külen class 10 aser 12 adentsübajisa tongtibangba lir. Joko, tanur ka class 10 adendangji pa shi temanga aiür aser asangur kümadoker aser tazüngba lenmang nunga pa mesüra laji kechi koba lenmangi aotsüar, iba shimtetba lenjemji class 10 tatidang ya lir. Iba sülenji ano class 12 ajangdangang ano khen kümkümshir shitak nisung küma nükjidong atongtsü asoshi merangtsüba lenjemji class 12 tatidang ya asütsü. Aji oda, kaketshir ka asoshi kaketshiba lenmang nung class 10 aser 12 ajangtetbaji tatembang masü saka shitakba kaketshisatsü aser mapa inyak angazüktsü tenzükba mapangjibo idangji dang tenzüker. Atangji, kaketshir ka taküm nung kaketshisatsü bushidang teimbakati küm 18 shi agitsüa akok, anungji kaketshir ka class 12 ajangdangbo pa mesüra la kaketshisatsü bushiba lenmang nung talangbalenka jajar asütsü. Iba sülenbo küm pongo trok ka tsüngda tanurji kechi akümtsüar kümadoktsü. Aji oda, tanur teimbaka class 10 ajanger kidang nungi tazüngi aoba sülenbo tsürabur kidang tsüraburtem den külemi alitsü mapang mangutsüa akok, kechiyong iba sülenjibo kar mapa ngur tangaleni oa adoktsü mesüra kibong kümadoker tsüraburtem den balala alitsü. Tsürabur aser tanurtem na prongla asoshi ibaji temenungratsüka lir. Iba mapangji meteta tsüraburtemi tanur class 10 aser 12 tatidang agütsüdang akhidang dang nungi anepalu tasüba anepalua tatidangji agütsüdaktsütsüla. Atangji, tsüraburtemi tanur meima anepalubaji parnok nem sen talubosa agütsübaji masü mesüra chiyongtsü tajung den chiyongdaktsübajia masü mesüra parnoki aginüba ajak agütsübajia masü. Ashiko, item temeim jagibo tanurtem takümang raksatsütsüa akok. Aji oda, tanurtem dang tsüraburtemi temeim sayudang parnok den külemi sarasadem mapang agibajisa tongtibangba asütsü. Tanur aika rongsen agibo atu saka sarasadem agi matuba ajanga jungnüseta repranga lia raksar. Iba denji tsüraburtem temeimji lenlang nungi masü saka tonga orr parnok den külemi mener sayutsü merangtsüla. Iba mapang tsüraburtemi tanurtem tebilemba, tebilemtsü aser nükjidong asüngdangtsüa akok. Iba mapangji tsüraburtemi tanurtem nüng sanga ajungshitsü mapang tajungtiba asütsü. Tanur shia asoshi Tsüngrem nükjidong balala lir aser iba yariji tanur shia nem tekolok aser shisatsü moaja lir. Ibaji tsüraburtemi angatetra tanurtem merenshia arütsütsü melen Tsüngrem nükjidong angatettsübajiang ajungshitsü. Tanur ka tajung kümdaktsütsü merangbaji tanurji masü saka asen lima aser lokti tajungba küma yanglutsü meranger ta tsüraburtemi angateta inyaktsü junger. Taküm 2016 küm ya NBSE ajanga agiba class 10 tatidang agütsütsü pur ajak agi kaketshir 22,969 aser class 12 tatidang agütsütsü pur kaketshir ajak  agi 37,477 lir. Item kaketshir  meyirijang roker noklang pezü ser lirtrok asoshi parnok taküm lenmang shimtsüba lemtet lenden ka ajurur asütsü. Item jagi Tsüngremi mulungba lenmang shimteta kaketshisatsü tajung bushitetra asüng asen lima yanglurtemji itemji asütsü. Tanü asen lima majungba ya tanur majung masü tsüraburtem majungba agi raksar aser lanurtem majungba agi masü taintem majungba agi raksar. Iba tebilemtsü aser timtem ya asenok tsürabur aser taintemi reprangteta tanü asenok den aliba tanurtem ya Tsüngrem metetba aser  alima meimba senso tajung kaka kümdaktsüra, asenoki repranga lia asen lima ya tajungba küma melenshitsü.