Parliament nung opposition-i timtem magütsütsüla: Venkaiah

Hyderabad, January 30 (Agencies): Honibarnü Union parliamentary affairs minister, M Venkaiah Naidu-i, Parliament nung Budget senden mapang Arunachal Pradesh aser Rohith Vemula ken otem jembitsü sorkari melunga lir, ajisüaka Opposition-i senden nung timtem magütsütsüla, ta ashi.
Parliament nung opposition party temi Arunachal Pradesh ken o aser kaketshir Rohith soseta asüba ken o sashia benoktsüsa temaitsü anguba nung ajemdaker Naidu-i, “Onok tebilemtsü kecha mali. Ken o ajak jembitsü sorkari melunga lir; ken o ajak jembitsü sorkar renema dang lir,” ta ashi.
“Arunachal Pradesh (ken o) nunga mesüra Hyderabad (Central) University ken o nung India sorkar mali,” ta Naidu-i ashi.
Item ken o ana nung opposition party temi senden nung timtem agütsütsü südi ta arendaka bilemer asü (?) ta asüngdangba langzüdang minister-i, “Parnoki (Congress) democracy inyakyim kadaktsüner asü timtem agütsüner’ar ibaji Congress dak keta lir, parnoki dang lemtettsü,” ta ashi.
Naidu-isa, “Ni tebilemba dang benoker: o lemteptsü, o tokteptsü aser telemtetba agitsü; senden nung timtem tagütsü,” ta ashi.