Higher Education Department-i Director den tepila sentong agi

Dimapur, January 30 (TYO) : Higher Education Director menden toktsür Chubatola Longkumer den January 30, 2016 nü tepila sentong ka ayongzüka agi.
Iba sentong ya Directorate of Higher Education indang conference hall nung agi aser Chubatola-i tepila o jembidang, Department aser Government College balala nung Principal tem dang kanga pelaba metetdaktsü.
Iba anogo ya Tsüngremer temoatsütem azüngba anogo ka lir aser nübor tenzükba wadang nung küm aika Tsüngremi yaria aruba atema pa nem tenüngsang agütsür, ta laisa ashi.
Higher Education asoshi tayongzükba aika lir aser tongtipangtibaji academic expansion lir aser Department nung Director taseni item tayongzükbatem kokteta inyaktsü amanger, ta Chubatola-isa ashi.
Laisa, Principal tem, Department kübok office aser staff ajak dang kaketshirtem jenjang ajungkettsü atema meranga inyaktsü tayongzükba agütsü.
Sentong nung Higher & Technical Education Parliamentary Secretary, Deo Nukhu-i Director menden toktsür nem tenüngsang agüja jembidang ashiba agi, aikati HoD jenjang tonga meinyakteter aser lai iba menden tashi inyaker mapa nungi anisüngzüktsüba atema Tsüngrem tenüng sangang.
Chubatola ji mapang amshir aser bendanga agüja inyakba ketdangser ka lir aser lai maneni lokti asoshi inyaktsü ayongzük,
Deo Nukhu-isa Director tasen, I. Alempokba pela agizük aser pa lenisüba kübok Department jenjang tajungba akümtsü imlar ta shisem.
Iba sentong nung Mt. Tiyi College, Wokha Principal, Dr. Apeni Lotha aser Additional Director Higher Education, I. Alempokba nati o tatsütsü jembi. Sentong nung mendenji Secretary, Higher & Technical Education, Imjung M. Panger IAS liasü aser Higher Education ketdangser aser staff-i ken ka aten.