DPC züngsemtem Hepatitis-B vaccine agi

Dimapur, July 21: Dispur Hospital, Guwahati nungi aruba medical team den DPC züngsem o DPRO aser staff tem Hepatitis-B atema vaccine agir tangokba noksa nung angur.

 Dimapur, July 21 (TYO) : Dimapur district nung media mapa inyakertem atema Dimapur Press Club (DPC)-i Dispur Hospitals, Assam den yaritepa July 21, 2015 nü Hepatitis-B vaccination camp ka agiogo.

Iba sentong ya DPC züngsemtem atema Press Point, Super Market nung agi aser media house balala nungi osangbenertem den külemi DPRO Dimapur staff temi shilem agi. Tanü mezüngbuba vaccination mozü agiba sülen tanabubaji August 21, 2015 nü agitsü.

Tanü vaccination camp magidang Tir Yimyim yimozülur, K. Temjen Jamir-i Guwahati nungi aruba medical team dang pelaba metetdaktsü.

Lokti ka nung media nung inyakertemji kanga dang tongtibang lir aser asen temang anema ali nung dang asenoki asen teinyaktsü mapa takok ngua inyaktettsü, ta Temjen Jamir-isa osangbenertem ayongzük aser DPC-i iba mapa tajung ayongzükba atema tenüngsang agütsü.

Guwahati Press Club tir, Nava Thakuria-ia o jembidang ashiba agi, osangbenertemi shirang menatsü kanga dang tezüba kechiyong aonung junga memejangba aser chiyungtsü mapang shitak nung achiajem masüba ajanga temang manemi akümtsü ana nung lir.

Anungji osangbenertemi health facilities ajak agitsüla, ta Nava Thakuria-isa ayongzük.

July 28, 2015 nü ‘World Hepatitis B Day’ amungtsü aser iba dak rangloker DPC-i sentong tajung ka ayongzüka agiogo.

Tanü vaccination camp metenzükdang, mezüng ‘Yes Bank’ nungi ketdangsertemi Dimapur Press Club züngsemtem den sensaksem mapang ka agia liasü.

Iba mapang Yes Bank ketdangsertemi DPC züngsemtem dang ‘101 hour social film making movement’ nung shilem agitsü ayongzük. Iba nung ajemdaker parnoki quiz competition ka agi aser iba nung DPRO office Dimapur nungi Kewongkhum-i mezüngbuba jenjang aser Dispur Hospital CEO, Sakia-i tanabuba jenjang nung takok angu.