Juvenile ozüng tasenba anema SC nem temepishiba agütsü

New Delhi, January 31 (Agencies): Tashiyim amshia taküm raksatsüba aser nisung tepsetba ama ken o tulu nung aibelenertem arishi küm 16-18 tanurtema tain ama kasa züngshia ken o akatsü atema tawa juvenile ozüng tasenba agizükogo, aser iba ozüng anema Deobarnü Supreme Court (SC) nung temepishiba ka benokogo.
Juvenile Justice (Care and Protection of Children) Act, 2015 ya tan asükwa mongpu Parliament senden nung agizüka liasü.
Iba ozüng tasenba anema Congress lenir aser lokti atema inyaker, Tahseen Poonawalla-i temepishiba ka ajanga, ozüng tasenba ya teshisadangba maka ka lir aser Linük Temzüng Arrla 14 anema lir, ta ashi.
Juvenile ozüng tasenba ajanga ken o tulu nung aibelener arishi küm 16 nungi temabo Juvenile Justice Board-i mezüng bushisüngdangtsü, aser tanurji rehabilitation atema yoktsü asü tain ama ken o akatsüar lemtettsü lateta lir.
SC nung benokba temepishiba nungsa, tang yanglushiba Act ya “kanga tesashi aser temzüng dak mapet”, parnok anepalutsü aser kümzüka ayutsü melena ken o tulu atemabo tain ama züngshitsü benoker, ta aija lir.
Kasa temepishiba ajanga, iba ozüng yanglushiba ya UN Convention on the Rights of the Child anema lir aser 1800s mapang nungi tanurtem kümzüka ayutsü lateta aliba anema lir, ta ashi.
Iba Act ajangasa, ken o tila nung aibelener arishi küm 16-18 tsüngdapurtema pa/la arishi küm 21 ajungba sülen ang apu nungbo tai ama kasa züngshitsü lateta lir.
Juvenile Justice (Care and Protection of Children) Act, 2015 tasenba ya January 15, 2016 nü nungi mapa küma benokogo.
Juvenile Justice (Care and Protection of Children) Bill ya Rajya Sabha nung agizük aser taküm January 4 nü Tir-ia agizüka liasü.
2014 December 16 nü Delhi nung tebur telok kati tetsür ka tashiyim amshia raksatsüba sülen tepsetba tatalokba sülen linük nung aikati ken o tulu nung aibelener juvenile tem-a tain ama kasa züngshia ken o akatsü takhangba agüja liasü.