Plastic agi alima menener

Alima rara tanabuba raraba sülen plastic adoka oset tapu balala yanglu tenzüker küm 70 jungogo. Aji oda, küm neter tsüngda plastic ajanga nisungtem nem anisüngzük agütsüba den plastic amshiba ajanga nisungtem takoksa ajurutsüsa inyakba mapatem medemdangra, plastic amshiba ajanga nisungtem takoksa aser tesama ajurutsüsa akümba jenjangjisa tuluba asütsü. Atangji, alima tanabuba rara tashibo kechisarina ajak yin agi yangluba osettem dang liasü, anungji tajungbo tajung saka taret liasü. Ajisüaka, kodang alima rara tanabuba sülen yin melena osettsüset teimbaka plastic agi yanglutsü tenzük, osettsüset aika jenjang temelaba, tepungbaba aser tajungba aküm. Ibayongji, tanübo dokani aodang kechisarina enoka abentsü yangluba plastic aser polyethylene bags nungi shir computer aser gari oset ajak plastic agi yangluba amshir. Ibaji meimchir asoshi temoatsü bushitetba aser yanglutetba tapu ka asütsü, kechiyong plastic agi yanglutetba osettsüset amshiba ajanga sen aika kümzüker aser anisüngzük tulu angur. Ajisüaka, asenoki temoatsü agi lendong küma amshiba osettem rongnung plastic agi yangluba osettem ya lir. Alima nung nisungtemi inyakba mapatem agi ali telong aser tema melenshiba indang bushidangertemi ashiba agi, joko alima nung alirtemi atom bomb yangluteta apokba nungi miim tango adokba, plastic amshiba ajanga alima menentsüba aser carbondioxide tali akümba ajanga alima nung alirtem ya lendong ajurutsüba putu ka tongogo. Aji oda, ali tema aser tzüim ajaklen plastic agi sünga kümogo. Iba jagi tzü menendaktsür aser ali takong kümdaktsür. Ibaji dang masü saka nisungtemi plastic agi yangluba osettsüset tejentem endokba aika tzüim telonglen sünga lir. Ibaji ango asoshi chiyongtsü akümer, anungji ango dak aketba shijia plastic agi akümba shi lir. Iba kasaji ozütemia plastic ya chiyongtsü ta bilemer pei techanu mesütsü merangdang süa adoker. Iba amaji nisungtemi plastic amshir endokba agi meilongi alima tesem tuluka plastic agi meyibangdagi. Nisungtem dang masü saka lima nung taküm alirtem asoshi lendongji aji lir. Alima nung ya küm nung plastic agi yangluba osettem touzük ton million 300 dak tali adoker. Iba touzükji alima nung alir nisungtem ajak touzük den kasa asütsü. Aji oda, alima rara tanabuba sülen nungi tang tashi nung plastic agi yangluba osetttemji touzük ton billion 5 shi asütsü aser 2100 küm tashi nungbo alima nung plastic agi yangluba osettem touzükji ton billion 30 junger asütsü. Iba jagi alima nung tatalokba tuluka ataloktsü. Iba ama asenoki anogo shia asenok nüngdak nung amshiba osettem agi asenok samatsüsa asenoki inyakdagi. Aji oda, asenoki amshiba aser endokba plastic osettem agi asen alidak aser temeket nunga komaka teraksa aser takok atalokdar ta reprangdangtsübaji tang mapang ya asütsü. Ashiko, asenoki endokba plastic oset tejentem to shizüka moi asen atsü aser alu nung aser ayongküm nung ali den külemi polongteper alitsüa akok. Iba jagi nokdanga yur tsünglu arudanga ali telongi tzü maitsü aser ali telong nungia madoktsü, anungji süngdonglidong memeyitsü. Ibaji dang masü asen lima nung ayong ajak plastic agi sünger joko ayong agi ayonga memesük jana tokdokdak amato küma odagi. Tanü alima nung asenoki ajuruba lendongtsüdong aser tashidak agi kangshiba ajak ya asenok amshiba oset agi asenok yiruba ama asenok mekümdangba ajanga atalokba lendongtem lir. Aji oda, mekümdangi plastic bag mesüra oset ka mashi tesem ka nung endokbaji küm talangka shirepa moi alitsü. Iba jagi lenmang aisü nung alima yirutsütsü. Item lendong ataloktsübaji meteta tanü alima nung alirtemi kechi inyakdir inyakaka alima menentsüsa masü saka tarutsü bilema inyaktsüla. Joko, alima nung industry tapu balala lapokba, gari tali tali akümba, bomb tesashi tendanga apokba aser kiojen tulu aser taret yanglutepba agi tatsükba akümer aser nisung taküm ali majung tzü mopong menena kümdagi. Ashiko, iba jagi alima nungi jena orr anüng petinu nung alitsü merangteper südi. Iba ama lima ka nung tanü asenok alir asünungji, asenok teinyaktsüa kechi asütsü (?) ta bilemdangdi.