Bangladesh nunger ka dak nungi shili seret 5 rangtoktsü

Dhaka, Jan. 31 (Agencies): Bangladesh nunger ka dak teka aser tetsüng naprongla nung süng teküp ama shili aika adoka lir, aser pa dang “Süngdong Tebu” ta tenüng jalokja lir; Küm 10 tejaklen pa teka nung süngsem ama shili adok tenzük, aser tesüsa ibaji intoktsü atema operation agitsü, ta tanü hospital ka ajanga metetdaktsü.
Khulna district nung Abul Bajandar indang teka aser tetsüng nungi shili tajemba agi seret 5 intoktsü atema renemshidar.
Dhaka Medical College Hospital (DMCH) nung osangbenertem den jembidang arishi küm 26 Abul-i, “Iba ya ajanga ni timtem mangutsü, ta tamasabo ni bilema liasü. Ajisüaka mezülongibo ni mapa meinyakteti akum. Tangbo kü teka nung inch ana-asem tera 12 dak tema lir. Ano kü tetsüng nunga tila kar lir,” ta ashi.
Bangladesh sorkari acha ayangba hospital tulutiba, DMCH nung doctor telok kati iba operation agitsü, aser operation agiba atema pa dang nungi sen magitsü sorkari lemtetogo.
Abul dak keta aliba shiliji tongti ‘nerve’ meraksatsüsa rangtoktsüla mesüra temang nung tanga timtem madoktsü atema pa dak test aika agidar.
Pa dak nungi adokba shili ya epidermodysplasia verruciformis lir ta putetogo. Iba tashitak ya kanga bulua maliba teküp tashitak ka lir.
“Iba dang ya ‘süngdong nisung’ tashitak taka bulua ajar,” ta DMCH director Samanta Lal Sen-i osangbener dang ashi.
“Tang tashi nungbo, iba ama tashitak ya Abul densema alima nung nisung asem dak dang adokba onoki meteta lir. Bangladesh nungbo tang mezüng asütsü,” ta paisa ashi.
2008 küm nunga Indonesia nunger ka dak iba ama shili rangtokogo.