Sorkari metetsümungo NCP lenirtem arishir: Pawar

Mumbai, February 02 (Agencies): Sorkari metetsümonga Nationalist Congress Party (NCP) lenirtem kanga arishir aser sorkar tashi tim mesüi amshia party lenir Chhagan Bhujbal tanük apu, ta Mongulbarnü NCP-i sorkar aija ashi.

“NCP lenirtem linük sorkari jakdaka arishir. Democracy linük ka nung sorkar tashi kodanga iba ama tim masüba nung mamshidang,” ta Nationalist Congress Party nung Tir Sharad Pawar-i Mumbai nung osangbenertem dang ashi.

Pai, taoba mapang deputy chief minister aser NCP lenir Chhagan Bhujbal indang tanük taoba mapang MP, Samir Bhujbal, Enforcement Directorate-i Hombar aonung apuba aitsüogo.

Bhujbal’er kibong nung timtem agütsüba dak ajemdaker, NCP Tir Pawar-i, Bharatiya Janata Party MP-i metetsümunga aser kanga jakdaka NCP lenirtem arishir ta ashi. Ajisüaka pai BJP MP tenüngbo temai adoka mashi.

“Bhujbal’er kibong kanga mejungi arishir. Ken o ka atema asemben tashi ki telungi ia mita reprangtsü kechi tenüngdaktsü ? Iba inyakyim ya ajanga bushisüngdanger telok dang tasüngdangtsü aika adoker kechiba süra parnok inyakba yimya agi BJP MP tsütsü tuluba adenba sayur,” ta taoba mapang union minister-i ashi.

Aji oda süaka, iba dak sentakba nung NCP-i lungkak maitsü kechiyong iba dang nungi tuluba nüburtem nüngdak aika anendaka lir.

Bushisüngdanger telok den ajak nung amalitepa inyaktsü, ta paisa ashi.

Chhagan Bhujbal’er kibong den ano tangar kar anema ochi mashi sen amshiba ken o ana benoka aliba dak sentakba nung gondha toku tashi asüngdangyaba sülen Samir pua ayu.

Bhujbal’er kibong den Chhagan aser par jabaso Pankaj o tanük Samir nunger ki ajak anogo tepiyong mita reprangba sülen pa apu.

Samir Bhujbal ya ‘Prevention of Money Laundering Act’ kübok apu aser iba ken o yimti nung aliba court ka nung Mongulbarnü angadangtsü.

Lokti tentet nung tim mesüi benshiba aser kaketshistü dak sentakba nung anogo asemnümung sentong ayonga amungdak o jembitsü asoshi US Congress-i jaokba ama Chhagan Bhujal Washington-i oer aliba mapang ka nung Samir apu. Chhagan ya Brihostibarnü US Tir Barack Obama den ajurutepa sensak asemtsü sentong lir.

Bhujbal’er kibongtemi tim masü mapa inyakba atema ola adoksang, Mumbai nungi BJP Lok Sabha züngsem Kirit Somaiya, “Onoki takok nguogo…Samir Bhujbal Enforcement Directorate (ED)-i puogo,” ta ashi.

Pai ashiba agi, ano Pankaj-a memunoi aputsü aser ED-i bushisüngdangba mapang amalitepa meinyakra Chhagan Bhujbal-a dena aputsü.

Bhujbal pusemertemi Samir apuba atema par jila Nashik nung lungkak aitdar aser ibaji ajanga police aika tesem nung adenshia lir.