Zach Johnson-i British Open takok marok agizükogo

London, July 21 (Agencies): America nunger golf asayar, Zach Johnson-i Louis Oosthuizen aser Marc Leishman na madak 4-hole asaya kokteta 114 buba British Open Golf Championship takok marok yashi Hombar nü agizükogo.
Johnson-i iba takok marok agizükba ajanga külem sensopur, Jordan Spieth-i ayuba Grand Slam takok marok agizüktsü nükla raksatsür lir.
Taoba mapang, 2007 nung Masters takok marok agizükba densema Johnson-i tan agi tanabuba tongti takok marok agizüker lir.
Yashi tatembangbuba 18 buba hole nung South Africa nunger Oosthuizen-i 12-foot birdie takok ngua mezüktetba yong Johnson-i takok ngua liasü.
Australia nunger Leishman-ia shot 3 agi memenepi Johnson nem takok ngudaktsü.
Taoba June ita stroke 1 agi memenepi Speith nem U.S. Open takok marok agizüktsü maongka agütsüba densema Oosthuizen-i tan agi tongti golf asayamong tanabuba nung 2 buba jenjang nguteter lir.
Speith-ia 17 buba hole nung 8-foot shot takok ngua mezüktetba yong pai tatembangbuba 18 buba hole nung shilem magitettsüsa aküm.
Arishi küm 39 tain Johnson-i 30-foot birdie kanga junga zükteta points 6-under 66 ngua yashi taribi agi yangluba takok marokji agizük.