Actress Rekha-i 2016 Yash Chopra Memorial Award agizükogo

Asemben buba ‘2016 Yash Chopra Memorial Award’ naroküm mongin Bollywood actress aser Rajya Sabha MP Rekha-i January 25, 2016 nü Maharashtra Governor C Vidyasagar Rao ket nungi agizükogo.
Reka ya shitakba tenüng Bhanu Rekha Ganesan lir, la October 10, 1954 küm Chennai (tang Tamil Nadu) nung aso.
1966 küm Rekha-i mezüngbuba Telugu film ‘Rangula Ratnam’ nung tanur shilem agia tenzük. 1970 küm ‘Sawan Bhadon’ ta asüba film nungi tenzüka küm 40 tasüngta lai tang tashi nung film 180 tema nung tongti shilem agia lir.
Lai Filmfare Awards asemben, Best Actress anaben aser Best Supporting Actress ‘Khubsoorat’ film 1980 küm angu. 1988 küm ‘Khoon Bhari Maang’ aser 1999 küm ‘Khiladiyon Ka Khiladi’ amala film nung ngua liasü. 1981 küm ‘National Film Award for Best Actress’Umrao Jaan’ film nung angu aser Government of India-i 2010 küm la nem ‘Padma Shri’ sempet agütsü.
Iba sempet ya Film nung shilem agir rongnunga taintemi dang angutsü aser iba den külemi tain asüyonga shibai shilem junga agia aru iba dakji ajemdaker shimmer.
2012 küm taoba producer-director Yash Chopra alima nungi pila aoba bilemteta iba sempet ya TSR Foundation of T Subbarami Reddy-i acha-ayanga küm shia agütsür. Iba sempet nung Gold Medal den senpet sen Rs. 10 lakh agütsür. Melody queen Lata Mangeshkar nem 2013 küm aser 2014 küm megastar Amitabh Bachchan nem ta agütsüogo.