Parliament senden mezüngnü rongrong adok

New Delhi, July 21 (Agencies): Tanü Rajya Sabha nung Parliament senden Monsoon session mezüngnü Congress-i Lalit Modi ken o nung External Affairs Minister Sushma Swaraj minister menden nungi alutsüla ta takhangba sashia agütsüba den külemi iba ken o nung o atsüteptsü/tokteptsü nungi BJP-i ajener ta shia rongrong adokogo.
Congress lenisüba nung opposition temi lungkak aitba ajanga anepdang senden nung senden asemben tashi thinena liasü koba ajanga Question Hour aser Zero Hour naprong melitet.
Senden nung House Leader Arun Jaitley-i iba onük nung tang o lemtep akatsü aser iba onük nung Swaraj-i sandong agütsütettsü, ta shia liasü.
Jaitley-i, “Parnoki olemtep kanüra, ibaji tangsa tenzükang. Parnoki External Affairs Minister nungi sangdong ka aginüra, iba asoshiji onoki mulunga lir. Sushma Swaraj-i minute pongu tsüngda sangdong ka agütsütsü,” ta ashi.
Aji oda süaka pai ashibaji manganba den Mendenbuba Hamid Ansari-i züngsemtem dang Question Hour alitsü melang ta shiaka Congress züngsemtemi senden nung maneni rongrong adokdaktsü.
Tanep iba senden tenzükliyongi Congress züngsemtemi election mapang Ato kilonser Narendra Modi-i sorkar yimsüsüba nung ochishitsü nangzükba indang tasüngdangba benoka liasü.
Asürtem nem akhüm agütsüba sülen Anand Sharma (Cong)-i Ato kilonser dang nungi telangzüba meshia liasü.
NDA sorkar tashii aruba sülen ita ana ser tesadang nung kechiba External Affairs Minister-i British sorkar dang Lalit Modi nem visa agüjang ta mepishi, ta pai Ato kilonser dang asüngdang.
Sharma-isa, Rajasthan Chief Minister Vasundhara Raje-i Lalit Modi asoshi affidavit nung sign asüba onüka benoka liasü.
Iba sülen Congress züngsemtemi senden sabang leni oa Sushma menden nungi atsüngdakjang ta yimyim ayim.
CPI(M) lenir Sitaram Yechury-ia Mendenbuba dang, iba onük nung jembitsü Sharma nem temelaba agütsü asünungji tangar nema jembitsü temelaba agüjang, ta ashi.
Yechury-i, “Congress nungi leniri jembiogo. Iba onük nung jembitsü asoshi onok danga melatsüla,” ta ashi.
Samajwadi Party nungi Naresh Agarwal-ia iba onük nung jembitsü mapang meshi saka memela.
Senden nungi maneni rongrong adokba ajanga Mendenbuba Hamid Ansari-i nikongdang 2:00 ako tashi senden thinena liasü.