PM-i dang ni union minister inyakba atema telemtetba agitsü : Sonowal

Shillong, February 3 (Agencies) : BJP-i Assam nung chief minister candidate atema pa tenüng sangdongba sülen Prime Minister Narendra Modi-i dang pa union minister menden atema telemtetba agitsü, ta BJP lennir Sarbananda Sonowal-i metetdaktsü.
“Ni union minister inyaktsü mesüra meinyaktsüji kü dak masü saka prime minister dak dang keta lir” ta Sonowal-i osangbener dang ashi.
Mongulbarnü Meghalaya yimtiba Shillong nung 12 buba South Asian Games jingle aser India Post ajanga ‘Special Cover’ & ‘My Stamp’ sayatsüba sentong nung pai iba olen jembia liasü.
2014 Lok Sabha election mapang BJP-i Assam nung takok tulu anguba ama taküm April-May tsüngda Assam assembly elections nunga takok angutsü atema mapa inyakang ta January 28 nü BJP parliamentary board-i Sonowal nem mapa nungloktsü.
2014 Lok Sabha election nung BJP-i Assam nung takok tajungba angu aser ibaji parnoki menden 14 nungi tenet nung takok anguba liasü. Assam nung takok tulu angubaji Sonowal ajanga liasü ta BJP-i pa nem tenüngsang agütsür.
Sonowal ya Assam BJP unit nung tir lir aser pai ashiba agi, assembly elections nung takok angutsü atema Asom Gana Parishad dena regional party tem den jembishinü südar.
“Onoki takok tulu angutsü imlar, kechiyong north east state tem nung BJP-i dang terenlok mapa inyaktsür. Ni nenok dang menden kwi nung takok angutsüar mashitsü saka Assam nung sorkar tasen tentettsü atema onoki menden peria dang angutsü” ta paisa metetdaktsü.
Tesüiba küm 15 tashi Congress-i tim mesüi yimsü asüba Assam nungeri laktetogo. Assam nungeri BJP nem takok ngudaktsütsü. Tesüiba küm 15 tsüngda Congress-i nübortem asoshi kecha meinyak, ta Sonowal-isa ashi.
Assam nunger aser north east state nung alirtemi kechisarena ajaklen terenlok asoshi BJP dangi meyiper. Asenoki Atal Bihari Vajpayee -i inyakba kümsük meyipa reprangdangra, BJP-i northeast nung terenlok bener arutsü atema DoNER (Development of North Eastern Region) tentettsü, ta paisa ashi.
“BJP-i aniba sorkarisa Assam kübok Silchar-Saurashtra (East-West) corridor tenzüktsü aser ano tanga infrastructure mapa aika inyaktsü tenzük. Vajpayee’er sorkari mapa aika inyaktsür lia ano tang Modi-i northeast state tem renloktsü atema mapa jenti inyaker” ta Sonowal-isa metetdaktsü.
Modi-sa union minister tem hopta ana nung khen northeast semdangtsü atema tetuyuba agütsü, ta pai shisem.
United Liberation Front of Asom (ULFA) den yimjung olemtep indang jembidang Sonowal-i ashiba agi taoba Congress-i aniba sorkari tamakok angu saka NDA sorkari iba mapa ya takok ngua inyaktsü.
ULFA den yimjung olemtep jenjang tajungba kümdaktsütsü atema NDA sorkari ULFA ‘general secretary’ Anup Chetia Bangladesh nungi India-i anir arutsü atema mapa inyak ta paisa ashi.