US-i death row nung mapang talangtiba ayur tepseta merenshir

Washington, February 03 (Agencies): US kübok Georgia state sorkari death row ta ajaba tasüba temerenshi agütsütsüpur ayudak mapang talangtiba puoka ayur, arishi küm 72 tain Brandon Astor Jones tanü tepseta merenshiogo.

Tashiyim agi rakzükraktemdang nisung ka injang agi kasetba ken o nung aitsüba sülen okadaki Brandon nem küm 36 tejaklen tasüba agi merenshitsü obendanga agüja liasü.

Brandon’er okatsür, Daniel Kolber-i Branden nem agütsüba temerenshi tanaben reprangtsü onük US Supreme Court nung benok saka okadaki iba onükji magizüki Brandon Georgia kübok Jackson tepuokdak tanep miim aketba injection agüja pa tepseta merenshi.

Georgia sorkari 1976 küm nungi tenzüka tanü tashi nung aibelener nisung 60 shi tepseta merenshiogo aser par death row nung tanga nisung 10 dak tema puoka lir.

1979 küm store manager, Roger Tackett injang agi kasetba ken o nung ajemdaker, Brandon den külemi, Van Roosevelt Solomon-a aitsü aser pa 1985 küm electric chair nung mendakja tepseta merenshi.