MGNREGA küm 10

India nung Mahatma Gandhi National Rural Employment Guarantee Act tenzüker küm 10 ajungba mong amongba sentongtem nung iba sentong ajanga nübortem ajangzükba indang kanga jembiogo. Iba sentong ya center nung Congress teloki yimsüsüba mapang tenzük aser tang BJP teloki yimsü süya lia küm ter ajungba küm, ato kilonser, Narendra Modi-ia dena MGNREGA sentong ajanga nübortem tajangzük anguba asoshi pelaba metetdaktsüogo. Tanü alima aika nung mapa inyaker meinyakma lir saka nübo manguba tebilemtsü lir, saka India nungbo mapa inyaktsü nübobo agir magima saka mapa makaba tebilemtsü agi yimten aser lokti lenirtem shisabolur. Ibayongji, linük nung mapa teinyaktsü makaba ajanga nübortem tachitajemtsü maka yaseta asür, abensüoshi maka sükseta asür, mozü malitetba agi mozü kidang anepalu mesütet asür aser tanurtem kaketshidaki meyoktetter. Aji oda, sorkar asoshi teinyaktsü tongtibangtibaji mapa makar nem mapa agütsütsüba khuret ya lir. Atangji, Nagaland nungbo mapabo aika lir ser nung azümasenba agi meinyaker asütsüa akok saka tanga state-tem nungbo azümasenba agi mapa meinyaker masü saka mapa teinyaktsü makaba agi meinyaker. Iba timtemji koktettsü atema küm ter jakdang center sorkari Naional Rural Employment Guarantee Act ya latet aser iba ozüng ajanga yimtaklir kibong shia nem küm nung anogo 100 ayangtsü mapa agütsür. Iba ayangtsüba mapajibo yimtak yimteni latettsü saka ayangba senotsü ajakji center sorkari yoktsü. Aji oda, pei yimtsüng nung yimkong nüngdakba mapatem inyaktsü asoshi kibong shia nung nisung kati küm nung nübo 100 agütsütsü aser anogo 100 ayangba senji center sorkari pa meyong bank account nung enoktsütsü. Atangji, mapa meinyaknüba agi masü saka mapa makaba agi sensak tia nung timtema alirtem asoshi küm nung anogo 100 ayangtsü mapa angubaji temoatsü tuluka lir. Iba sentong ajanga yimtak yimtsüngtema kanga renlokogo aser nübortema anogo shia pei nüngdak alitettsüsabo senotsü nguogo. Ajisüaka, tezüdangtsü kaji MGNREGA ajanga mapa inyaktsü pur Job card akartemi mapa meinyaki sen aginür. Iba jagi tesem aika nung yimkong ajungtsü asoshi terenlok mapa tajung kar inyaktsü melen kenü ‘social work’ ayongzüka monger anogo noklang ka ayanga ama sen agizüka agitsü meranger. Joko, asenok tangatetba jenjangji iba tashiji luadokogo. Shitakba agibo senji mapa inyaker bank account nung dang indangindang enoktsütsü, iba jagi dang tom nung shingaia ayangertem indang sen agizüka mechitsütsü, saka tang tashibo bank ajanga masü saka ketdangsertemi dang alemer. Aji oda, Nagaland nung MGNREGA ajanga yokba sen mashimashi amshiogo ta aija Congress tiri metetdaktsübaji shitak süra asenok ajak center sorkar tsüngdang taaktsüka asütsü. MGNREGA sen mashimashi amshiba tetezü yimtak sensaker aser mekokmeinertem sen miimzüka chitsüogo ta aitsür. MGNREGA sen mashimashi amshiba tetezüji yimtak mapaa maka aser tachitsüa maka ta tasü yimten nung shisabolua aliba purtem indang sen chitsüba asütsü. Atangji, iba sen ya yimtak putu menden aser Village Development Board-i memeteti amshitsü aser endoktsü makok, anungji MGNREGA sen mashimashi amshia lira, ibaji yimtak yimsüsür aser VDB khuret asütsü. MGNREGA inyakyim nung kibong shia anogo 100 ayangtsü asoshi shimtetba nisung tenüng nung Job card yanglutsü aser küm shia yimtak yimkong lokti senden lia MGNREGA sentong ajanga inyaktetba mapa aser meinyaktetbatema dena süoka jembitsü. Idangji dang yimtak küm piyong inyaka aotsüba sentong latettsü. Tanü Nagaland nung MLA, minister, Secretary aser Director-tem dang nungibo yimtak Village Council aser VDB dak tashi tuluba agüja lir, anungji yimtsüng renloktsüba jenjangji state sorkar nung alirtem dak masü saka Village Council aser VDB nung alirtem dak tuluba keta lir. Tekalen alirtemi mashimashi inyaknüyonga yimtak alir yimsüsürtemi memelara meinyaktettsü. Aji oda, yimtak yimsüsürtem aser VDB nung ketdangsertemi mashimashi inyaknüyonga yimtaklirtemi memelara meinyaktettsü. Anungji, Congress tiri ashiba amaji, Nagaland nung MGNREGA sen mashimashi amshia lira, yimtaklirtemi mashimashi amshitsü melaba agi asütsü !.