Kohima nung AR-i NSCN(K) züngsem ka khaset

Kohima, July 21 (TYO) : Mongulbarnü Assam Rifles sepaitemi Kohima nungi tatsü ka pilar NSCN(K) züngsem ka khaset aser prangpong-injang aika ngutetogo.
Kohima jila nungi kilometer 7 shi pilar aliba Puliebadze arem nung NSCN (K) telungpurtemi khen atema tesep ka amenteta liasü aser tanep parnoki Assam Rifles patrol party ka dak injang khaloktsü, ta AR osang ajanga ashi.
Iba mapang sepaitemi meyiper telungpur den khatep aser idangji NSCN(K) züngsem ka khaset, ta AR-isa metetdaktsü.
AR patrol party-i iba tesem nung bushitepa aodang 9mm Sub-Machine-Carbine ka, .32mm pistol ka, prangpong balala 4 den pistol magazines, injang tapu balala indang round 81, Chinese grenade 3, Improvised Explosive Device 2 aser Military Grade Anti-Tank Mines ana ngutetogo.
Iba tesem nung prangpong-injang bendena ayubaji Kohima jila aser temeket nung kiralongraba mapa inyaktsü atema liasü, ta Assam Rifles-isa metetdaktsü.