ISIS den tesentaktep alir ka Delhi nung puogo: Delhi Police

New Delhi, February 05 (Agencies): New Delhi, Kashmere Gate ISBT nung kiralongrar telok ISIS den tesentaktep alir arishi küm 28 tebur ka Delhi Police-i puogo.

“Central Intelligence Agency nungi osang ka aruba nung ajemdaker aibelensang, Ibrahim Sayyed apu. Sayyed ya Mumbai, Malad nung Muslim tekülem ki ketdangser ka lir. Pa den külemi inyaker ka ajurutsü atema pa Delhi-i aru,” ta Special Commisioner of Police (Special CP), Arvind Deep-i ashi.

Sayeed ya senotsü agütsür ka ama inyaker aser taoba mapang pai nisung pezü nem sen 50,000 agütsüogo. Par pezüpronglaji taoba ita Haridwar nung puogo.

Parnok ajakji taoba mapang Indian Mujahideen telungpur ka aser ISIS nung adentsü aor ka den tesentaktep liasü.

“Pa (Sayyed) ya taoba ita apuba nisung pezü, talisa Akhlaq den kanga metetepa liasü,” ta Deep-i ashi.

Tang police-i pa indang taoba otsü bushisüngdangdar aser police special cell team kati linük yimtiba nung pa den külemi inyaksemertem bushidar.

Taoba ita Delhi Police-i ISIS den tesentakatep alir nisung pezü- Akhlaq ur-Rehman, Mohammed Osama, Mohammed Azim Shah aser Mehroz nunger Manglour, Uttarakhand nung apuba sülen parnoki Haridwar nung Ardh Kumbh Mela amaktsü sentong aliba jungkai adok.