Nisung 2 tepsetba ken o nung tebur chanu ka apu

New Delhi, February 05 (Agencies): Tantsür ka alenseta südaktsüba ken o nung arishi küm 17 tebur ka puogo, aser Juvenile Act tasenba kübok pa mezüng tain den kasa ken o akatsü akok.

Iba Act tasenba ajanga tashiyim amshia raksatsüba aser nisung tepsetba ama ken o tulu nung aibelener arishi küm 16-18 purtembo tain ama kasa ken o akatsü lateta lir. Act tasenba ya January 15, 2016 nungi mapa küma benokogo.

Delhi Police-i Juvenile Justice Board dang, tebursang jagi arishi küm 13 tebur ka tepsetba sülen ita pongu lir ano tantsür ka tepsetogo, anungji pa ya tain den kasa ken o akatsüla, ta mepishiogo.

Pai mezüng tebur ka tepsetba sülen ‘juvenile home’ ka nung ayu, iba mapang pai yimya tajung sayuba den külemi par tsüraburi pa class 10 tatidang agütsütsü atema pa chioktsü mepishiba ajanga chiok. Ajisüaka ano pai South Delhi, BK Gupta Colony nung arishi küm 65 tantsür ka tepsetba aser la sen den senti osettem auyaba ken o nung puogo.

Delhi police-i benokbaji Juvenile Justice Board-i agizükra Juvenile Justice (Care & Protection of Children) Act tasenba kübok pa mezüng ken o akatsü.

Juvenile Justice Bill ya December 31, 2015 nü Tir-ia agizüka liasü.