Indian Coast Guard-i Pak nunger 11 apu

Ahmedabad, February 06 (Agencies): Honibarnü Indian Coast Guard (ICG)-i Kutch district nung aliba Jakhau coast nungi pilar India nunger tzü arrtsü nung ozüng alema aruba Pakistan nunger angopur rong ka sotba sülen Pakistan nunger 11 puogo, ta Coast Guard ketdangsertemi ashi.
“Jakhau tzüyimkümlen India nunger tzü-i nautical mile trok aiter Pakistan nunger indang feet 40 talang rong ka apu,” ta Defence otongdar captain, Abhishek Matiman-i ashi.
“Yangji mena alir angopur 11 pua lir,” ta paisa ashi.
Mapang shia India nunger aser Pakistan nunger tzüyim security agency temi tzü arrtsü adena aitertem apur.
Tang Pakistan nunger jail balala nung India nunger angopur 440 shi puoka lir, parnok timbaka Gujarat nungi lir. Iba den külemi India nunger angopur rong 860 shi Pakistan ket nung lir.
Tawa angopur tentet kati shidi ka ajanga Ato kilonser Narendra Modi dang, Pakistan nunger tepoukdak aliba angopurtem chioktsü aser parnok meyong rong meyipa agütsütsü atema mera agidaktsüner ta mepishia liasü.
Iba shidiji Porbandar Fishermen Boat Association Tir, Manish Lodhari-i zülua liasü. Lodhari ya National Fishworkers’ Forum nunga Secretary lir.