Teloktep Africa mitkartemi Boko Haram den raratsü renema lir: Buhari

Washington, July 22 (Agencies): Teloktep Africa miktar teloki Boko Haram ta ajaba kiralongrar telok den raratsü renemba osang ka Nigeria Tir, Muhammadu Buhari-i tanü Bodbar nü metetdaktsüogo.

Nigeria nung azünger tetsür kaketshir noklang aika tashiyim agi pua anir aoba den külemi, Nigeria aser kidangsüa aliba linüktem nung nisung meyirijang aika tepseta lendong atalokdaktsüba Boko Haram telok ya ita 18 tsüngda nung meshimeshia samatsütsü ta Buhari-i tawa sangokja lir.

Ajisüaka, Boko Haram teloki Nigeria anüdoklentip tsütsü, Chibok nungi yaküm April ita pua anir aoba tetsür kaketshirtem mima ayudak den sentakba osang tejangja meteta maliba olen ka metetdaktsüba ajanga alima ajungai Buhari aser pai aniba sorkar kanga sashia aitsüogo.

“Boko Haram teloki pua anir aoba tetsür kaketshirtem chioktsü melena Nigeria sorkaria tepuokdak puoka aliba kiralongrartem chioktsü renema lir,” ta US Tir, Barack Obama den Washington yimti nung ajuruteper anogo tanabuba nung osangbener den ajurutepdang Buhari-i ashi.

Nigeria Tir menden benoker ita 2 buba nung arishi küm 72 tain Buhari-i tan US semdanger lir.

Buhari jakdang Nigeria Tir menden abensang, Goodluck Jonathan-i aniba sorkari imlaba ama meinyakba ajanga mejungi akümba tesendaktep tanaben tajungba küma yanglushitsü asoshi Buhari aser Obama nati aniba linük anati nungdakba maparen inyaktsü tenzüka lir.