AGP-i BJP den tesentaktep ayutsü akok : Mahanta

Guwahati, February 7 (Agencies) : Taruba Assam assembly elections nung Assam Gono Parishad (AGP)-i Congress den tesentaktep kecha malitsü, saka BJP denang tesentaktep alitsü, ta Deobarnü AGP lennir aser taoba Chief Minister Prafulla Kumar Mahanta-i metetdaktsü.
“Tangatetba nung, onoki Congress den tesentaktep meyutettsü. AGP ya Congress anema tentetba telok ka lir, anungji Congress den tesentaktep alitsüji tamakoktsü” ta Mahanta-i ashi.
Paisa ashiba agi, AGP-i regional party kar den jembishinüa arur saka tang tashi BJP denbo olemtep kecka mali.
BJP-i onük tajung bener onok den jembishinütsü atema arura, onoki parnok den lemteptsü akok, ta Mahanta-isa ashi.
Bangladesh nungi ozüng alema aruba maparen anema küm trok tashi All Assam Students Union tir ka ama lungkak aitba sentong ketdangsüa arur Mahanta arishi küm 32 asüdang Assam nung Chief Minister mezüng inyak.
1985 nungi 1990 aser ano 1996 nungi 2001 tashi Mahanta Assam nung Chief Minister inyak.
Hokolbarnü Mahanta-i New Delhi nung senior BJP leader L.K. Advani den ajurutep.
“Ni Advani den meteteper joko mapang talangka arur. Pa kinungtsü temang manemi lir aser iba jagi ni pa semdang” ta paisa osangbener dang ashi.
2009 küm BJP aser AGP na tesentaktep yur Lok Sabha elections nung toktep aser iba mapang BJP-i menden pezü aser AGP-i menden ka nung takok angu.