Centre-i Arunachal nem senotsü agütsütsü : Rijiju

Itanagar, February 7 (Agencies) : Centre-i Arunachal Pradesh nem senotsü tetsükdaktsü kecha melii dang agütsütsü saka senotsüji ochishia terenlok atema amshitsüla, ta Union Minister of State for Home, Kiren Rijiju-i metetdaktsü.
Tang Arunachal Pradesh nung President’s Rule agüja lir.
“Ni Arunachal Pradesh ya linük nung state mezüngbuba kümdaktsünür. Arunachal nung ali rongsen aika moaja lir aser state tajungtiba kümdaktsütsü asoshi asenoki yimten telemsaba kecha melii longjemer terenlok atema sentong atongtsü nüngdaker” ta Rijiju-isa metetdaktsü.
State Infrastructure Development Fund kübok Raga constituency nem senotsü kecha melemzüktsü ta osang angazükba atema Rijiju-i ashiba agi, state sorkari constituency ajak nem senotsü timi lemsa agütsütsüla.
Paisa, Raga MLA Tamar Murtem dang Raga nung infrastructure mapatem inyaktsü atema asadangtsü mapa nungloktsü.
Lower Subansiri district kübok Raga nung Boori Boot Yullo benjungmung nung Rijiju-i iba onük ya jembia liasü.
2019 tashi nung iba constituency kübok aliba yimtsüng ajak gari lenmang agi sendakteptsü ta Rijiju-isa metetdaktsü.
Linük yimtiba nung northeast nungertem kümzüka ayutsü atema Delhi Police-i Arunachal Pradesh aser tanga NE state tem nungi nisungtem anioktsü, ta Union Minister of State for Home-isa ashi.