Manipur nung Kuki nunger amakba ajanga tensa raksatsü tsübur

Imphal, February 7 (Agencies): February 3, 2016 nü Pallel jila anasa Molnom yimertem dak injang akahba tatalokba Kuki lokti tentettemi aitsüba sülen Manipur Police-i Deobarnü security akangshiogo.
Kuki nunger yim Molnom nung alirtem dak injang kahloktsü aser iba mapang Lunkhogin Haokip ta ser lanur ka yiru, ta yimdaklirtemi ashi.
Chandel district nungi Kuki Chiefs` Association, Kuki People`s Forum, Thadou Students` Association aser Kuki Students` Organisation-i sangdong ka nung National Socialist Council of Nagalim (Isak-Muivah) züngsem kari yimdaklirtem dak injang agi akah ta aija lir.
Kuki Reformation Forum-isa iba tatalokba aitsüogo aser iba inyakyim ajanga NSCN-IM-i kin ka samatsütsü asoshi mapa inyakba bilemtetdaktsür, ta parnokisa ashi.
February 3 aonung NSCN-IM telungpurtemi Molnom yim longpang aser iba mapang asangur asem ayongi or arudang injang kahloktsü, ta KCA, KPF, TSA aser KSO külem sangdong nung metetdaktsü.
Kuli kecha makai injang amshiba inyakyim noktangtsü atema Centre aser state sorkartemi mapa inyakang, ta parnokisa sangdong nung takhangba agüja lir.
Parnokisa ashiba agi, yaküm August 22 nü Aimol Ngairong yimtsüng bomb aser prangpong amshia amak aser idangji yimdaklir ka asü.
Honibarnü Manipur state litsü kümzüka ayutsü atema lokti sentong ka ayongzüka agi aser iba kasa mapang All Naga Students` Association Manipur (ANSAM)-i Manipur nung aliba Naga nunger asoshi “alternative arrangement” ka alitsüla ta takhangba agütsü.
Okram Ibobi Singh-i aniba sorkari kübok Naga nunger melinür anungji Naga nunger asoshi ketdangsübaren inyakyim balaka ka alitsüla ta mapang talangka nungi Manipur nung Naga nungertemi takhangba agüja arur, ta ANSAM-i sangdong ka nung metetdaktsü.