Afghanistan nung bomb lendong atalok; 9 pokset, 23 shi yiru

Afghan National Army ketdangser kati Afghanistan kübok Mazar-i-Sharif yimti tezülen atalokba bomb lendong nung yirur tebur chanu ka tezüleni anir aoba noksa nung angur. (Mazar-i-Sharif, February 08)

Gardez, February 08 (Agencies): Peisasa pokseta asütsütsü mulungteter Taliban telungpur züngsem anati Afghanistan sorkar aser mitkar ketdangsertem pokseta südaktsütsü nükjidong nung pokshiba lendong tesashi ka tanü, Hombar nü atalokdaktsüba osang jangjaogo.
“Pakistan arrtsülen, Afghanistan anüdoklen Paktika province nung tentetba Yahyakhil district nung bakery dokan ka kimalen atalokdaktsüba pokshiba lendong nung nübur 6 tashi poksetba osang jangjaogo,” ta Yahyakhil district governor, Musa Khan Kharuti-i osang jangjashitsü.
“Tanü amakertemi bakery nung shishilemba alir sorkar ketdangsertem tepsettsü nükjidong nung lendongji atalokdaktsü akok,” ta shia, tanü lendong nung ishiba agi nisung 23 shi yiruba osanga pai metetdaktsü.
Ano külen, Afghanistan anüdoklentip tsütsülen, Balkh provincial capital, Mazar-i-Sharfi anasa Dehadadi district nunga Afghan National Army (ANA) mitkartem aniba bus gari ka anasa pokshiba lendong atalokdaktsüba ajanga mitkar züngsem 3 tashi poksetba osang ka Afghan defence ministry-ia metetdaktsüogo.
“Tanü lendong nung tetsür 3 densema, ishikba agi nisung 14 shi yiruba osang tang tashi nung jangjaogo,” ta Balkh provincial governor’er otongdar, Munir Ahmad Farhad-i metetdaktsü.
“Piesasa pokseta asütsü mulungteter kati pa temang nung alenokba bomb pokdakja ANA’er 209th Shaheen Corps mitkartem aniba bus gariji amakba osang jangjaogo,” ta pai shisem.
Tanü lendong atalokdaktsübaji par züngsemtemi inyak ta shia, Taliban telok otongdar, Zabihullah Mujahid-i tanü lendong atalokdaktsüba atema tenüng agia metetdaktsüogo.
Küm 15 tejaklen nungi tenzüka Afghanistan nung Islam ozüng benoktsü merangba Taliban teloki tanü amala lendong balala mapang shia atalokdaktsüba osang bushiteta lir.