Iraq o Syria na nung IS anema rarabaren anentsü: Canada

Ottawa, February 09 (Agencies): Canada-i par mitkar tayimtsü yoka Iraq aser Syria na nung tesep tenteta lendong kanga sashia atalokdaktsüba kiralongrar telok tetsüti, Islamic State (IS) anema raraba maparen tan February ita anentsü lemtetba osang ka metetdaktsüogo.

“Ozü mitkar fighter jet tayimtsü 6 tashi Iraq aser Syria na nungi tan February ita 22 nü tashi nungbo ozü linüki meyipa bener arutsü lemtetogo. Ajisüaka, ozü itangitsü aser totzü abenba tayimtsütemibo tang IS den teraradak US-i aniba alima teloktep mitkartem den maneni yariteptsü,” ta Canada Ato Kilonser, Justin Trudeau-i yashi, Hombar nü metetdaktsü.

Ano, tang Iraq anüdoklentip tsütsülen Kurdish sepaitem nem tongpang raratsü terenemshiba agüja alir mitkartem timba kümdakja par mitkartem timba yokshitsü lemtetba osang ka Trudeau-isa metetdaktsüogo.

“Ozü Tir, Barack Obama-i Trudeau den telephone ajanga jembia alima teloktep mitkartemi Iraq aser Syria na nung IS telok anema takok angutsü tenzükba osang lemsatepa liasü,” ta White House-ia metetdaktsü.