China nung tanur tasüka taremtsü anasa shia aru

Beijing, China, February 09, 2016 : China nung tanur tebur ka süogo ta ser tasümang ayuba tesem nung aonung piyong yur taremtsü anasa taküm aliba metet, ta TV osang ka ajanga metetdaktsü.
Zhejiang anüdoklen aliba provine Pan’an nung tasümang aremba tesem nung inyakertemi taoba Hokolbarnü tasümangji aremtsü asoshi renemkhunemba mapang tanurji anüngtsü tenzük, ta provincial television osang ajanga metetdaktsü.
Taoba Brihostibarnü iba tanur süogo ta ashiba sülen temperature 12 degrees Celsius (10.4 F) aliba tasümang ayuba takdang nung gondha 15 tashi yua liasü.
Tanurji taküm ta metetli yangji inyakertemi tebu nem osang agüja tang iba tanur Intensive Care Unit (ICU) nung yaridar.
“Iba mesükba tatalokba ya tan mezüng angur. Ya chichiba sayatenya ka lir,” ta January ita nung iba tanur mapang matong dang asoba, Pan’an hospital nung doctor kati ashi.
Iba tanur ya sor anogo 23 tashi incubator ka nung yua liasü aser Hombarnü Küm Tasen tenzükba anogo nung kidang lidaktsünüba agi iba sülen tebui kidang anir ao.
Ajisüaka kidangi anir aoba sülen tanur temang tamajungba aküm. Doctor kati tanur temulungjang mapa inyakba anenogo ta shia February 4 nü iba tanur süogo ta metetdaktsü.
Tanurji tasümang ayuba tesemi bener mao tsüngda tebui pa nem süoshi ajak anana semtsürang yangkhu temelem ka nung alep aser ashiba agi ibaji ajanga tanurji kümzük asütsü.
Aji oda süaka iba tanur jungjunga kümteta arudaktsütsü atema doctor temi kanga kümdanga anepalutepdar.