PDS jang dak aketba ken o nung tatem tashi nokdaktsü : MTLT

Mkg. Feb.09 (TYO) : Mokokchung nung Public Distribution System (PDS) ajanga aruba ‘supply jang’ dak aketba ken o adoka aliba ya nübortem ajangzüktsüsa tatembang kati maru tashi lanurtemi kanga junga mita reprangtsü ta Mongolbar nü sangdong ka ajanga Mokokchung Town Lanur Telongjemi metetdaktsüogo.
Iba kasa maparen dak aketba ken o jembitsü asoshi Mongolbar nü Deputy Commissioner office nung lokti tentettem nungi lenirtem jaoka senden ka menogo aser iba senden nung DC-i tim teinyaktsü inyaktsü nangzükogo ta parnokisa ashi.
Mokokchung town nung supply jang mashi amshiba dak aketba maparen nung pongsem alir dokantem ajak iba ken o ya metembang tashi shibanga yutsütsü ta Mokokchung DC-i senden nung adenertem dang nangzükogo ta paisa ashi.
Iba maparen dak aketba ken o bushisüngdangtsü asoshi February 4, 2016 nü Food & Civil Supplies Department, Mokokchung nung Store Keeper, Supongnüngsang aputsü asoshi ‘court arrest warrant’ agüja liasü. Ajisüaka, tanü senden nung S.P. Mokokchung-i ashiba agi, inyakyim nung timtem kar aliba ajanga pa aputsü ozüng agüja alibaji mapa küma meinyaktet. Ajisüaka, nübortemibo SP ajanga tamakok anguba mapa nungji temulung melemi bilemer ta MTLT-isa metetdaktsü.
Iba sülen tanü Mongolbar nü Supongnungsang-ji District Magistrate ajanga jaok saka pa marunungji, tanü nikongdang 1:00 ako shi nung pa anema ‘non-bailable arrest warrant’ agütsüogo aser SP-ia paji yaktasa aputsü nangzükogo ta lanurtemisa metetdaktsü.
Iba ochimashi maparen bushisüngdangba luden nung lokti tentettem nungia züngsem karbo adentsüla ta lanurtemi takangba agüja liasü saka DC-i ibaji atema menuogo ta ashi nung pa nem agüja iba o ji agizüker, ajisüaka tebushitetbaji nübortemi imlaba ama mesüra ochimashirtem ket nungi Mokokchung kümzüktsü asoshi nübortemi tim teinyaktsü inyaktsü ta MTLT-isa metetdaktsü.
Tanü senden ya DC ajanga ayongba liasü aser iba senden nung Mokokchung Town Lanur Telongjem, All Ward Union, AKM, Watsu Mungdang, Ao Senden aser SP nungertem dena liasü.