Eagles teloki Grammy nung Glenn Frey nem tetushi agütsütsü

Los Angeles, February 11, 2016 : America rock kentener telok Eagles nung guitarist, asür Glenn Frey-i par telok asoshi nüngtugu ken “Hotel California” aser “Tequila sunrise” na zülu aser 58buba annual Grammy Awards sentong nung par teloki parnok tembar Jackson Browne den Eagles indang ken ka ajanga külemi shilem agiba mapang pa nem tetushi agütsütsü.

Grammy trokben angusang, Glenn Frey ya temang nung timtem aika adoka arishi küm 67 nung taoba ita asü.

Grammy tiben angusang Don Henley, Grammy khen angur Bernie Leadon, Grammy asemben angur Timothy B. Schmit Eagles aser Grammy ponguben angur Joe Walsh Eagles züngsemtem den Browne-i parnok ken ka nung külemi shilem agitsü, ta sangdong ka ajanga metetdaktsü.

“Glenn Frey yamai kara iba lima nungi pilaba ajanga ajak akoksar,” ta Recording Academy nung Tir aser CEO Neil Portnow-i ashi.

“Eagles-i küm 45 dak tema ken tsütsü onok nem temelenshi aser terenlok aika bentsür aruogo. Grammy sabang nung Glenn nem tetushi agütsüba mapang onoki par telok den Jackson Browne dena kanga akümtsübua jaoker,” ta Portnow-i shisem.

Staples Center nung February 15 nü akatsü aliba sentong ya LL Cool J-i ketdang asütsü aser India nunga iba sentong ya VH1 nung February 16 nü live yoktsü.

Glenn Frey-i “Hotel California” ken mejemba atema 1978 küm Record Of The Year aser “I dreamed there was no war” ken atema 2009 küm Best Pop Instrumental Performance award tem ngua liasü.

“Eagles telok ajanga music nung terenlok bentsür aruba nüngtem nung asenoki Glenn atema mapang tatsüka agitetba ya shitak dang lir,” ta Grammy awards executive producer Ken Ehrlich-i ashi.

Don Henley aser Stan Lynch na Cass County album nungi “The cost of living” ken atema Best American Roots Song award atema tenüng benoka lir.