Germany-i Iraq nem teyari sen million 566 aputsütsü: Merkel

Berlin, February 11 (Agencies): Germany linüki Iraq sorkar nem dollar sen million 566 apuja par linük yaritsü tenangzükba olen ka Germany Chancellor, Angela Merkel-i tanü, Brehostibar nü metetdaktsüogo.

Iraq linük nung nungdakba ki o jen tajungba küma yanglushitsü maparen nung yariteptsü nükjidong nung Germany linüki Iraq nem tan teyari senji aputsütsü nangzüker lir.

Merkel-i lar linük semdangsang, Iraq Ato Kilonser, Haider al-Abadi den Berlin yimti nung ajurua senden ka amendang iba tenangzükba olenji metetdaktsü.

Germany-i Iraq nem teyari sen aputsüba den külemi, Iraq kübok tentetba yimti aser jila balala nung tongpang raradang amshiba aser tang mepoki aliba bomb-tem mepokdaktsüi agiena nisung malidak pokdoktsü maparen nunga Iraq sorkar den yariteptsü mulunga aliba olen ka Merkel-i tanü metetdakja liasü.

Yimti aser jila balala nung mepoki aliba bomb-tem agienba ajanga bendanglen, linük aser tesem balala nung tang jenoka alir Iraq nunger refugee nisung million 3 shi tanaben par talidaki shilangtettsüsa tang jenjang ajurua lir.

“Iraq nüburtemi pei linük toktsür bendanglen jenoka malitsüsa par taküm jenjang tajungba kümdaktsütsü aser parnok nem teimla tasen agütsütsü alizüng ozü Germany linüki yua lir,” ta Merkel-i lemsatep.

Pei linük toktsür Europe talisa, Germany nung kanga sashia jenoka alitsü meranger refugee nisung meyirijang jenti rong nung Iraq sensotema kanga longsoa densemba osang bushiteta lir.

Ano, refugee nisung ama sayua ozüng alema Germany linük telungi aitsü merangertem aser ozüng alema refugee nisungtem shibelenertem nokdangtsü asoshi Germany aser Iraq nati aroki lungjemer nungdakba maparen inyaktsü onük ka Merkel-i tanü senden nung benokba osanga jangjaogo.