Taküm aika melaludang Siachen ken o latettsüla: Pakistan

Delhi, February 11 (Agencies): Pakistan den International arrtsülen aliba Siachen Glacier nung tawa lendong atalokba nung densemer India nunger mitkar Lance Naik, Hanumanthappa Koppad tanü asüba ajanga linük nüburtem mangyimba anogo ka nung Pakistan-i, Siachen ken o latettsü atema mapang tongogo, ta ashi.

“Nisung taküm jenti melalutsü atema asen linük ana tsüngda Siachen ken o ya kanga rongtak süa tekaratiba nung latettsüla,” ta Pakistan High commissioner Abdul Basit-i ashi.

Basit-isa, “Siachen nung alimai bener arutsüba lendong nung nisung jenti mesamatsü asoshi inyaktsü mapang tonger ama onokibo bilemer,” ta ashi.

Ano külen tanga osang ka nung India nunger senior army ketdangser kati, “Lance Naik Hanamanthappa alima nungi pilaogo. Tanü 11:45 ako nung pa tango tesüsabuba sashiogo,” ta metetdaktsü.

Madras Regiment, 19th Battalion nungi arishi küm 33 mitkar Hanamanthappa-i kinüngtsü, Mahadevi Ashok Bilebal den arishi küm ana jala, Netra Koppad na toktsür alima nungi pilaogo.

Pa ya Karnataka district, Dharwad district kübok Betadur yimtsüng nungi lir aser pa küm 13 tejaklen army nung dena liasü.

February 3, 2016 nü Siachen Glacier nung aliba army post ka rürjeb agi anenbangba sülen pa anogo troknü tashi rürjep telung nung liasü, aser February 9 nü New Delhi nung aliba Army Research & Referral Hospital nung yari, ajisüaka yashi pa temang tamajungba akumba sülen tanü alima nungi pilaogo.