Delhi nung maneni April 15 nungi odd-even scheme benoktsü

New Delhi, February 11 (Agencies): Brihostibarnü Delhi Chief Minister, Arvind Kejriwal-i, linük yimtiba mopung menenba nokdangtsü atema Delhi sorkari ano maneni April 15 nü nungi 30 nü tashi odd-even scheme benoktsü, ta metetdaktsü.

Tanü osangbenertem senden nung jembidang Aam Aadmi Party (AAP) tongti lenir aser Chief minister, Kejriwal-i, iba sceme benoktsü atema nisung aikati sorkar nem telangzüba tajung agüja liasü, aser item telangzüba nung ajemdaker iba scheme tanaben benoker, ta metetdaktsü.

Chief Minister-isa, iba scheme ya ita shia benoktsü ajungtsü asü (?), ta sorkari hopta ana tashi o lemtepa aruogo, ta metetdaktsü.

“Iba scheme ya April 15 nungi 30 nü tashi benoktsü. Board exam April 12 nü tembangtsü, iba sülen onoki iba scheme benoktsü. Iba scheme kübok, kanga tongtibang nisungtem (VIPs), tetsürtem aser tetsüng ana aketba talongtsü amshirtembo iba ozüng agi melentsü,” ta pai ashi.

Paisa, public transport jenjang ajungkettsü atema sorkari bus tasen 3,000 alizüker, aser item bus ji December ita tashi nungbo senzütsü, ta ashi.

Osangbenertem den jembidang Kejriwal-i, iba scheme tanabubaren nung kanga tongtibang nisungtembo iba ozüng küboki maittsü, ta ashi.

“Onoki VIP tem dang iba (odd-even) system benshitsü mepishitsü, saka parnokbo iba ozüng agi malentsü. VIP temi peisasa melungteta iba scheme benshira kanga ajungtsü,” ta AAP tongti lenirisa ashi.

CM-i Delhi nüburtem dang, sorkari DTC bus ano aika alizüka senzüdaktsütsü ta nangzükogo. Iba scheme kübok gari nung kija senzür tetsürtem aser tetsüng ana aketba talongtsü amshirtembo anogoshia senzütsü melatsü, ta ashi.

Iba scheme takok ngua benoktsü atema mapa nungi anisüngzüker aliba sepai 500 shi shima mapa lemzüktsütsü, ta Kejriwal-isa ashi.

Delhi nung January 1 nung 15 tashi mezüng odd-even scheme benoka liasü.