Nagaland Angh-i Scouts & Guides nem sempet agütsü

Dimapur, July 22 (TYO) : July 22, 2015 nü Durbar Hall, Raj Bhavan nung Nagaland Angh aser NSGSG Chief Patron-i Nagaland State Bharat Scouts & Guides (NSGSG) indang sempet agütsüogo.
Tanü Guides 30 aser Scouts 19 nem 2015 atema Rajya Puraskar (Governor’s) Award agütsü aser 2014 atema Scouts Rashtrapati (President’s) Award Guides 13 aser Scouts 9 nem agütsü.
Rajya Puraskar sempet dang Governor’s Award ta ajar aser iba ya arishi küm 13 tain Scouts & Guides nem Scout Master aser Guide Captain training agiba sülen agütsür. Iba sempet nung badge aser certificate ka ka agütsür.
“State tila ka dang süaka national jenjang nung Bharat Scouts & Guides-i sempet timba anguba atema kanga pelar aser iba ya lanurtem asoshi mapa tajung ka lir,” ta tanü Angh PB Acharya-i ashi.
Nagaland State Bharat Scouts & Guides ya 1967 tenzük aser iba mapang Scouts 540 aser Guides 50 dang liasü. Ajisüaka tangbo Scouts 2064 aser Guides 1870 tashi lir, iba ya tetenzükertemi meranga inyakba aser asen lanurtemi shilem tajung agiba ajanga lir, ta paisa metetdaktsü.
2014-15 tsüngda NSBSG-i mapa tajung aika inyakogo aser parnoki Swacch Bharat Mission, Advance Course for Scout Masters & Guide Captain testing camp nature study cum presentation programme, training camp, aser state adena orr training centre balala nung shilem agiogo, ta Angh-isa shisem.
Angh-isa state sorkari lapokba school tem nung BSG uniform aser nüngdakba osettem alitsü atema sen lakh ka tenla agütsü.
Iba sentong nung mendenji Youth Resources & Sports Nagaland Parliamentary Secretary aser Nagaland State Bharat Scouts & Guides tir, Khriehu Liezietsu liasü aser pai ashiba agi Scouting aser Guiding maparen ajanga Scouts aser Guides sempet aser yimyayimpong ajungkettsür.
Paisa Governor’s Award aser President’s Award angur nem tenüngsang agütsü aser maneni Scouts & Guides ajaki pai tajungtiba agi tenzüktsü ayongzük.
Iba sentong nung Youth Resources & Sports Director & Vice President NSBSG, Asangla Imti-i tesentepertem pela agizük aser State Chief Commissioner, NSBSG, Khyomo Lotha Ex-MP-i anküp tepela o jembi.
Sentong nung Coraggio School Kohima ajanga “You Raise Me Up” ken aten aser School Education Minister, Yitachu, Chief Secretary Nagaland Pankaj Kumar IAS aser tongti ketdangser den school aika aden.