Sorkari “Women Reservation” onük nung angatettepner

Kohima, Feb 11 (TYO): Nagaland nung Municipal aser Town committee nung shilem agitsü asoshi tetsürtem nem noklang nung shilem semerasem (33%) agütsütsü tim ta temeten meshiba ken o tang Supreme court nung benoka lir, ajisüaka okadak masü saka sorkar o Nagatsür telongjem na tsüngda tangatettep kati arua latetner, ta Nagaland sorkari Nagatsürtem dang temepishiba ken o ka metetdaktsüogo.
Iba temepishiba o ya yashi Bodbar nü Kohima nung Chief minister, T.R.Zeliangi anir sorkar tongti ketdangsertem kari Nagatsür telongjem nung lenirtem ajurua jembidang metetdaktsü. Iba senden nung Naga Mothers’ Association lenirtemi anir Naga kin shia nungi tetsürtem telongjem tentettem nungi lenirtem parnok 26 tashi dena liasü. Iba kasa senden nung Eastern Nagaland Women Organisation (ENWO) purtembo parnok alidak timtem lendong atalokba ajanga medentet.
Iba osangbener den jembidang, NMA tir Wt.Abieu Meru-i ashiba agi, parnoki kasa onük state sorkar ajurua jembidang, state sorkar tsütsü Chief Minister-i anir Parliamentary Secretary, Municipal Affairs, R. Tohanba, Chief Secretary Pankaj Kumar aser Secretary Municipal Affairs, Maongwati Aier nungertem den ano tongti ketdangsertem kar denema liasü. Aser tetsürtem tsütsü nungi NMA tir den NMA Advisor Rosemary Dzuvichu den Naga kin shia nungi tetsürtem telongjem nungi lenirtem densema liasü. ENWO purtembo parnok alidak lendong timtem atalokba ajanga medentet.
Nagaland nung Municipal aser Town Council election ya 2010 küm nungi meliteti arur, anungji memenui iba election agitsü asoshi sorkari “Women Reservation” onük ya okadak masü saka timi tangatettep kati aruner ta iba senden nung tetsürtem dang metetdaktsü.
Ajisüaka, tetsürtemi sorkari bilembaji magizük. Tetsürtemi iba ken o ya okadak dang latetdaktsütsü ta metetdaktsüogo.
” Onoki sorkar tebilembaji magizüker saka taoba mapang amato masü saka tangbo sorkari onok bushia okadak masü saka panroksasa tangatettep kati arudi ta shidangba atema pelar,” ta NMA tiri metetdaktsü.
Iba ken o ya supreme court nung February 16, 2016 nü angadangtsü lateta lir.
Nagaland nung 2010 küm Municipal aser Town Council election agitsü aliba magi thinenba ya tetsürtemi iba ken o ya okadak benokba kija agi dang masü saka election nung lendong timtem tulu atalok tsübuba agi magi süidaktsü.
Iba kasa onük nung ya state sorkar o tetsürtem na yashi ajurutepa jembibaji mezüng liasü aser ano ajurutepa jembitsü imlar ta NMA leniri metetdaktsü.