School Education nung inyaker aser tesayurtemi nendaka inyaktsüla

Kohima, Feb 11 (TYO) : Nagaland nung School Education department kübok inyaker aser tesayurtem ajaki pei mapa aser khuret meteta nendaknendaka inyaktsüla ta tanü parnok lokti senden ka nung School Education aser SCERT minister, Yitachui metetdaktsüogo.
Tanü Brehostibar nü Kohima nung School Education department nung inyaker ketdangsertem rongnung Government School-tem inyakyim pentettsü merangba senden ka nung jembidang Yitachui iba ken o ya metetdaktsü.
School Education department nung timtem tulutibaji Directorate, District aser Sub-Divisional office tsüngda inyaktepba maparen file nung timi inyaka maor, iba jagi maparen shitak inyaka moutetter ta School Education minister-baisa ashi.
Office nung inyakbaren ajak file nung jungjunga inyaka toktsütsüla, iba jagi tesülen arurtem kecha meratai mapa shitak inyaka otettsü ta paisa ashi. Tang nungibo department nung inyaker shingaia pei kinunger adianu apia mapa nung anioktsü memerangtsüla, iba amaji inyakba putetra ozüng anema inyaker asütsü ta Yitachuisa metetdaktsü.
Nagaland nung sorkar school-tem nung inyakyim tajungba küma bentetogo aser ibaji kaket kümer yakta adoktsü, anungji tang nungibo School Education department nung inyaker aser tesayurtem ajaki sorkari kongi yokdir, tashi angaa nübortem tenzükdaktsüner ta paisa mepishia metetdaktsü.
“Asenok aikati district headquarters aser town nung dang linür saka asenoki tsüket nung aliba yimtsüng tashiji oagi mesayura, asen lima tejakleni maotsü,” ta paisa ashi.
School Education department nung inyakyim penteta inyakba ya kar akoksadaktsütsü asoshi masü saka tajungba kümdaktsütsü asoshi inyaker, anungji tesem aika nung nüngdak apir school-tem ka küma loktepogo ta Yitachuisa metetdaktsü.
Paisa ashiba agi, lenlang aser tsüket nung inyaker tesayurtemi Directorate aser Secretariat nung inyakertem den nüngdak mapang jet ta jembitettsü asoshi sorkari Interactive Voice Response System (IVRS) enoktsütsü tebilemba lir.
Paisa ashiba agi, Nagaland nung SSA aser RMSA ajanga kaketreju aika yangluogo saka item rongnung karbo shitakba nungbo yanglua mali aser karbo nisung malidak arem nung yanglua lir.
“Tesayur kar mapa angutsü nükjidong nung school lapokbaji tai aser center nungi tiyazü nung teyari agizüka achitsü atema school nung taila tenüng züluokba ajanga Nagaland nung school züngdur anener aika amai adoker,” ta minister-isa ashi.
Taküm küm nungibo ita asem shia DEOs aser SDEOs mesüra Field Officer-temi school ajak repranga orr osang agütsütsüla aser iba osangji February, May, August aser November ita nung agütsütsüla ta paisa metetdaktsü.
Iba kasa senden nung Commissioner & Secretary, F. P. Solo-i jembidang, par department nung inyakertem dang office inyakyim nung yazü aser taila kecha enoka meinyaktsü asoshi tekümdangtsü ka metetdaktsü. Shitakba inyak nung dang sentong ajak shitak yanglua reprangtetter ta paisa ashi.
Tang ya sorkar school nung tesayur tajung dang lir aser tesayur shia tanur ter dang atar, saka sorkar school nung tazünger tajemba akümer, anungji tanurtemi züngnütsüsa sayuyim agitsüla ta Soloisa metetdaktsü.
Iba senden nung School Education Director Senthang aser Additional Director Pollem Tep nati tepela o jembia liasü.