Nagaland nung kiralongraba mapa tulu ka noktangogo : AR

Dimapur, July 22 (TYO) : ULFA(I) aser NSCN(K) nati Nagaland nung kiralongraba mapa tuluka inyaktsü aliba nokdangogo, ta PRO, Assam Rifles Kohima-i sangdong ka nung metetdaktsü.
Paresh Barua-i yaria SS Khaplang mendenbuba ser United National Liberation Front of West South East Asia (UNLFWSEA)-i Nagaland, Manipur, Arunachal Pradesh aser Assam kiralongraba mapa inyaktsü sentong atonga liasü, ta sangdong nungsa shia lir.
Osang angazükba agi, taoba ita ishika tsüngda radio controlled Improvised Explosive Devices aika Nagaland-i bener aruogo aser itemji Dimapur, Kohima, Wokha, Mokokchung, Mon o Tuensang nung amshitsü nükjidong liasü. Tapoktsütemji nisung aliba tesemtem nung pokdakja tetsübu tensa bener arutsütsü aser state sorkar nem UNLFWSEA aginüba inyakdaktsütsü atema nükjidong liasü, ta PRO sangdong nungsa shia lir.
July 21, 2015 nü Pulibadze tenem nung Improvised Explosive Device 2 aser Military Grade Anti-Tank Mine 2 anguba ajanga UNLFWSEA-i tasa tamajung atongba kuli jungkai adoka sayur. Iba tesem nung anguba Improvised Explosive Device anaprongji seret 4.5 shi liasü aser iba jagi RCC ki ka chirepdaktsütsü tashi liasü.
NSCN(K)-i ULFA(I) amala kiralongraba telok den tesentaktep ayuba atema sasa bilemtsür. Myanmar nung aliba NSCN(K) kübok Naga nungertem Myanmar sorkar den Ceasefire tenangzüktep agir jangratema alir, saka parnoki India nung aliba Naga nunger lanurtem mashileni ania pei adianu anema raratsü tuyur, ta PRO sangdong nungsa shia lir.
Taküm August ita Independence Day matongdang UNLFWSEA-i Nagaland, Assam, Manipur aser Arunachal Pradesh nung mapa tamajung inyaktsü bilemer. Anungji sensosangertem kümdanga alitsü metetdaktsür aser taitsü aketba osetsüsettem ngura tekaratiba nung police aser security force nem osang sangoktsütsü mepishir. Nagaland nung yimjung lidaktsütsü aser state renlokdaktsütsü atema Security Forces-i maneni meranga inyaktsü, ta Assam Rifles PRO-isa metetdaktsüogo.