Ao ken ‘Yimjung Ola’ kensep ka sayaogo

Hogulbarnü Hotel Metsüben nung Yimjung Ola album meshitettsür Rev. Dr. Takatemjen den kentenertem aser sentong nung shilem agirtem külemi tangokba noksa angur.

Mokokchung, Feb. 12 (TYO) : Mokokchung nungi kentener parnok tenet (7) lungjemer yangluba Ao ken CD audio kensep (album) ka tenüng agi “Yimjung Ola” ta ser Hogulbarnü yangi Hotel Metsüben Mokokchung nung Rev. Dr. Takatemjen ajanga meshiteta sarasademer sayaogo.
Iba kensep nungji ken ajak agi ti (8) lir. Kentener par teneti ken kaka tena lir aser parnok ajak lungjemer atenba ken ka densema lir. Iba kensep ya yaküm 2015 küm tetenzüklen nungi yanglu tenzükba tang ang asangsang kümteter ta ‘Yimjung Ola’ telok nungi Taliakümi sentong nung jembidang ashi.
Taliakümisa album adokba nükjidong kar lemsatepdang, tanü asen lima yimjung agi anünga lir, iyongji ‘Yimjung Ola’ ya bener aruogo. Aji oda, album cover nung olive tou alibaji yimjung teimla indang temaitsü lir. “Naji yimjung bener aruba nung kongki (instrument) ka lir” ta paisa ashi.
Kasa sentong nung iba album dak sentakba nung tebilemba kar I.Temsü Jamir ajanga ashidang, ‘Yimjung Ola’ nung aketba kentemji asen lokti dak sentakba indang teimba lir aser kentemji tensa den apet mejema tenogo aser kenzülu (lyrics)-temji kanga tarok aser teshisadangtsü aika keta lir.
Yimjung Ola nung kentenertemji; Taliaküm, Imtiyanger, Matang Mongro, Chubanungla, Arsashi Ozüküm, Arenla Imsong aser Tiameren Jamir nungertem lir. Parnok ya liso nüngtugu kentenertem tesa lir. Iba album ya yakta cassette ayokba dokantem (market) nung angutsü.