Govt. school tajungba akümtsü

Tang ya Nagaland nung sorkar school-tem tajungba küma aotsü merangba mapang ka lir. Iba mapa takok angutsü asoshi School Education minister-ba nungi tenzüker Secretariat aser Directorate nung inyakertem den ano district aser sub-division nung ketdangser aser tesayurtem ajaki kanga ochishia aser meranga inyak nung dang takok angutsü. Nagaland nung School Education department inyakyim shitak küma yanglushir school-tem tajungba kümdaktsütsü mulungtetba mapaji Nagaland ya tasen küma yanglushidi ta asüba khuret den kasa lir. Nagaland state tenzükdang department balala lapokyonga aoba rongnung kanga temulung agüja lapoka inyakba department-ji Education department ya liasü. Aji oda, Nagaland state tenzüker külen private school-tem ya lapokyonga mao tashika tashibo government school nung inyaker tesayurtemji Tsüngrem tenzükertem danga taoba bilema tanurtem tajung kümdaktsütsü asoshi taküm bendanga agüja inyakba otsü tanü tashi jembir. Tanü Nagaland nung school Education department meshitaki akümbaji mezüng tesayurtem sülen inyakertemi parnok senmangji mangmatetba ajanga lir. Mezüng tesayurtemi kaketreju nung tesayur mapa inyakbaji ita sen agitsü asoshi inyakba masü mesüra tanga mapa manguba agi masü saka pei lima tajung kümdaktsütsü asoshi tanurtem taküm yanglutsünüba tejangraba aser tangatetba agi tesayur akümba liasü. Item tesayur tajungtemji lanurtemi melenyonga aodang, tom ka nung kong kodaser meshitak akümar memeteti government school agi school memesük kümdaktsüogo. Akhidangbo, government school nung tesayurtemji Tsüngrem ama bilem aser akümtsübu, saka tanü iba aküm to kong sama aser kong endokar memeteti samaogo. Aji oda, lanurtem mapang tesayurtem rongnung pei pei mapang tonger mapa nung temaba jenjangi atudang inyakyim tajungba tajungba küma inyaka ao masü saka School Education Directorate agi Directorate memesük raksatetogo. Ibaji School Education Directorate nung inyakdanger aser inyakertem asoshi dang masü saka Nagalang asoshi takoksa rongnung takoksatiba aser maksü rongnung maksü tulutiba asütsü. Iba takoksa jagi tanü Naga nunger kibong ajak kangshir aser iba maksüji tanü National aser Regional level nung Education dak sendakba sendentem alidang Nagaland tenüng nung adenertem nem chidaktsür. Tanü Nagaland School Education department nung inyaker tulur aser tanishirtemi School Education Department kübok Government School kwi, tesayur kwi aser school tanur kwiar mejangjatetter. Aji oda, School Edcation nung ketdangsertemi School Education department nung inyaker nisung kwiar meshitettsüsa asenok meyong School Education departmentji raksateta lir. Atangji, School Education department aliba ajanga nisung aika ita sen tajung agia jangratema lidagi. Ajia temoatsü. Ajisüaka, School Education department nükjidongji aji masü. Aji oda, School Education department nükjidongji sorkari lapokba school nung tanurtem nem angati kaketshisatsü tajung agütsütsü aser parnokji takidak akaba nisung tajung kaka kümdaktsütsü asoshi lir. Iba nükjidong atongtsü atema sorkari tesayurtem nem akok tashi ita sen tajung agütsütsü meranger aser school nung nüngdakba osettem agütsür. Ajisüaka, tanübo asenoki school lapokba ya tanurtem nem kaketshisatsü tajung agütsütsü asoshi lapoker masü saka nisung ishika tesayur mapa angutsü aser nisung ka ana 4th grade mapa angutsü atema lapoker amai bilemer. Iba jagi school aika nung tanur tazünger mali ser tesayurtem ita sen chidagi. Ano, tesem kar nungbo school mali ser tesayurtem shimba osanga lir. Item tai tangatetba aser ochimashi mapatemji rakteta endoker, tesayurtem dang masü saka Minister, Secretary aser Directori anir DEO aser SDEO purtem ajaki pei lima meima Nagaland nung Govt. school-tem ya kaketshisatsü tajung angazükdak tesem kümdaktsütsü asoshi mulungtettsüla. School Education department nung inyakertem mapa yabo temeshi mapa, kechiyong ibai tangar tajung kümdaktsütsü asoshi inyakba mapa lir. Aji oda, tangar tajung kümdaktsütsü asoshi taa dalang agia inyaker shitak meinyakra, kechi ataloktsü !