T.R Zeliang-i NER nung connectivity tajungba kümdaktsütsü ayongzük

Dimapur, February 12 (TYO) : February 12, 2016 nü Chief Minister T.R Zeliang-i Hotel de Oriental Grand, Kohima nung ‘Mainstreaming the North East’ mungdang lapoktsü.
Iba mungdang ya North East Region (NER) nung rongsenren jenjang ajungkettsü atema teinyaktsütem lemsateptsü nükjidong nung ayongzüka agir, ta Chief Minister TR Zeliang-i tongti tesemdanger o jembidang ashi.
North east tesem aser India tsüngda tesentaktep tajung aliba NER ji linük den ka küma longjemtettsü aser tesentaktep mezüngbubaji railway, roadways aser air, aser tanabubaji newspaper, TV, internet amala ajanga media tesentaktep lir, ta paisa ashi.
Tang tesentaktep anaprongla mejungi lir, saka Bangladesh kübok Cox Bazaar ajanga internet broad band highway tasen yangluba mapa ajanga North East tesem nung internet connectivity tajungba akümtsü aser ibaji India den liromedema asütsü akok, ta TR Zeliang-isa shisem.
Iba internet connectivity ajanga NE tesem nung BPO aser tanga internet dak sendakba industry tem asoshi lenmang lapoktsütsü aser itemji ajanga lanurtem mapa inyaktsü maongka angutsü, ta paisa ashi.
Nagaland Chief Minister-isa ashiba agi, North east nung highways aser railways yangluba ajanga India aser temeket aliba linüktem den sendakteptsü. Iba ajanga North east ya alima nung kinük nung aliba tesem ka masü saka international trade & development atema tongtipang tesem ka akümtsü,
India aser south east Asia linüktem den gari lenmang aser railway lenmangji Nagaland nungi Imphal adena Moreh border town tashi yanglutsüla aser iba atema Assam kübok Doboka lenjem nungi Moreh ajanga Kuala Lampur tashi east-west corridor ji asütsüla, ta TR Zeliang-isa ashi.
Paisa ashiba agi, 1997 küm Indian railways-i Peren adena Diphu (Dhansiri) nungi Karong, Manipur tyshi train lenmang yanglutsü DPR agizük aser iba lenmang yanglutsü asoshi taoba Union Minister Nitish Kumar-i Karong nung lung azünga yutsü, ajisüaka meshitetba yimtenren mapa kar ajanga iba mapatong melena Silchar adena Imphal tashi train lenmang ka yanglutsü mapa inyaker.
Nagaland sorkari Assam-Silchar-Imphal indang train lenmang yangluba nung tebang maiter, saka South East Asian railway connectivity tsütsü bilemra 1977 küm agizüka ayuba Diphu-Karong railway project jiang tajungba asütsü ama bilemer aser iba lenmangji Imphal adena Moreh tashi yanglu nung junger,
TR Zeliang-isa Indo-Myanmar arrtsülen aliba nisungtem tejakleni anir arutsü atema arrtsü nung jara yangluba masü saka gari lenmangtem yanglutsüla.
Gari lenmang aser communication maliba agi iba tesem nung telungpurtem jenokdak tajung kümdaktsür aser asenoki iba tesem nung connectivity ajanga lenmang meyanglura, idakji aliba nisungtem merenloktsü aser linük den liromedema moutettsü, ta paisa ayongzük.