Tamil Nadu election atema Congress-DMK lokteper

Chennai, February 13 (Agencies): Honibarnü senior Congress lenir aser Rajya Sabha Opposition Lenir, Ghulam Nabi Azad-i, Tamil Nadu nung taruba assembly election atema party-i DMK den lokteper tokteptsü, ta sangdongogo.
Honibarnü Chennai nung DMK tongti lenir, Karunanidhi’er kidang pa den senden ka amenba sülen osangbenertem den jembidang Azad-i, “Tamil Nadu election nung DMK aser Congress na lokteper tokteptsü. Onok tongtibangba nükjdongji, DMK-i aniba sorkar ka kümner,” ta ashi.
Party ana tsüngda menden lemsaba dak sentakba tasüngdangba ka langzüdang Congress leniri, iba onük nung ano maneni DMK lenirtem den senden amentsü, ta ashi.
Paisa, iba election ya DMK leniba kübok tokteptsü aser iba teloktep nung DMDK densema ano tanga party tem anioktsü atema onoki Karunanidhi’er party nem tashi agütsür, ta metetdaktsü.
Congress-i Sri Lanka Tamil nunger ashioktsü ta tai tonglokja 2013 küm DMK-i Congress den tesentaktep raksaba aser 2016 küm na tsüngda kechi tangatetba nung melenshir, ta asüngdangba langzüdang Azad-i, yimtenren nung mapangi tensa balala sempeter lir ta ashiba den külemi taoba mapangtem nunga party ana longjemer state election nung takok nguyonga aruogo, ta ashi.
Spectrum allocation ochimashi ken o nung taoba mapang Union Minister A Raja aser Karunanidhi’er jala Kanimozhi apuba mapang ka nung DMK-Congress teloktep raksaa liasü.
Taoba Lok Sabha election nung state Congress-i tanga party den meloktepi toktep aser menden ka nunga takok mangu aser taoba assembly election nung DMK den lokteper toktep saka menden pongu dang ngua liasü.
Tamil Nadu Assembly nung menden 234 lir.
India South tsütsü tongtibang state tem nung Congress ya küm 50 jungnüa sorkar tashi nung mali aser parnoki Dravidian party- DMK mesüra AIADMK densa lokteper toktepa arur.
Mapang kakabo parnok kijai toktepdanger saka takok mangur.
Honibar nü Azad leniba nung Congress nungi teshimtet telok kati DMK tongti, Karunanidhi ajurua senden amenba mapang taruba election nung party ana lokteper tokteptsü lemtet.
Tamil Nadu nung taküm April-May ita assembly election agitsü.