NATO-i Russia den senden amentsü nungdaker: Stoltenberg

Munich, February 13 (Agencies): Europe ajunga nung tensa junga lidaktsütsü asoshi North Atlantic Treaty Organization (NATO) tentet aser Russia nati jembiteptsü senden ka amentsü nungdaka akümba olen ka NATO General Secretary, Jens Stoltenberg-i tanü, Honibar nü metetdaktsüogo.
“Russia-i tim masüba maparen inyakba ajanga par linüki Europe ajunga nung tensa mejungi kümdaktsür,” ta pai Russia aitsü saka NATO o Russia na tsüngda tesendaktep mejungi mekümdaktsütsü bilemba olen ka Stoltenberg-i sangoktsü.
“Russia den amalitepa alitsü aser ibaji ajanga Europe ajunga nem tajangzük bener arutsütsüsa NATO-i nungdakba maparen inyaktsü nangzüker,” ta pai nangzüka liasü.
Paisa ashiba agi, Russia den senden amenba ajanga par tentet o Russia nati angatettepa tesendaktep junga yutettsü.
“Ni Russia Foreign Minister, Sergei dena yashi, Hokolbar nü ajurutepa liasü aser NATO-Russia council senden asangsang nung takok ngua amentsü lenmang bushitsü asoshi künati pangjemogo,” ta Stoltenberg-isa metetdaktsü.