Russia-i Syria nüburtem anema merarar: Medvedev

ISSG teloki Germany kübok Munich yimti nung amenba Munich Security Conference nung Russia Ato Kilonser, Dmitry Medvedev-i o jembiba noksa nung angur. (Munich, February 13)

Munich, February 13 (Agencies): Russia-i par mitkar tayimtsütem amshia tai maketba Syria nüburtem rong nung bomb tsükdakja amakba maparen meinyaker ta Russia Ato Kilonser, Dmitry Medvedev-i tanü, Honibar nü metetdaktsüogo.
Syria tensa tajungba kümdaktsütsü nükjidong nung Syria Tir, Bashar al-Assad-i aniba sorkar mitkar aser sorkar anemer na tsüngda tongpang rarabaren anentsütsü asoshi tang Germany kübok Munich yimti nung temendak International Syria Support Group (ISSG)-i yashi, Hokolbar nü lemtet aser tanüngba ISSG linüktemi Russia aitsütsü tenzükba sülen Medvedev-i tanü iba olenji par linük metenja ashi.
Hopta ka ishi lir külen Syria nung tongpang rarabaren anentsütsü lemtetaka, ISSG nung densemba linüktem rong nung mangatettep adoka onük aika nung tangatetba balala bena aliba osang bushiteta lir.
“France linüki Russia nem aküm agütsür. Ajisüaka, Russia-i par miktar tayimtsütem yoka Syria nübur rong nung bomb-tem tsükdakja amakba maparen anenadoktsüla kechiyong yamaji inyakba ajanga dang Syria nung yimji yimjung tia asangsang nung bener arutsütettsü,” ta France Ato Kilonser, Manuel Vallss-ia tanü senden nung Russia aija liasü.
Russia nungi teyari agir Assad-i aniba Syria sorkar mitkartemi Syria nung yimti tulutiba, Aleppo sorkar anemer ket nungi tanaben agishitsü alizüng asangsang nung ajangzüktsüsa tia ka ajuruba mapang ka nung ISSG-i Syria nung tongpang rarabaren anentsütsü mapatong tenzüker lir.
“Yashi, Hokolbar nüa Russia mitkar tayimtsütemi anüng nungi bomb tsükdakja Syria nung tentetba mozüki aser kaketrejutem amakba osang bushiteta lir,” ta shia, Turkey foreign minister, Mevlut Cavusoglu-ia Russia aija liasü.