Malayalam oshi nung sangro aser ken zülur O.N.V. Kurup süogo

Thiruvananthapuram, February 13 (Agencies): Nübur aikati kanga junga meteta aliba nüngtugu sangro aser ken zülur O.N.V. Kurup arishi küm 84 nung, nija mozü ki ka nung Honibarnü süogo, ta par kinüngertemi metetdaktsü.
Kurup ya tain kümer temang nung timtem kar adoka mapang tatsüka okronger kinüngtsü den jabaso ka aser jala ka ta yutsür iba lima nungi pila.
Pai college aika nung sayua liasü. O.N.V ya Malayalam sobaliba asoshi tongibang nisung ka liasü aser ibaji ajanga 2007 küm linük nung literary sempet rongnung tulutiba, Jnanpith Award angu.
Pa akümlidang pai Padma Shri aser Padma Vibhushan sempettem anguba den ano tanga sempeta aika nguogo.
O.N.V-i mejemba kentem ajanga national film award aser state film award 13 tashi ngua lir.
Pa school azüngba mapang nungi pai sangro kanga jangra liasü. Pai mezüng züluba sangro “Munnottu” (Tejakleni) 1946 küm kaket nung adok.
Pai tesülen meyipa mereprangi anogoshi mera ka ka agia state nung iba akhümket jenjang tongteta state nung aliba nüburtem ajaki akhümtsübutsüsa aküm.
Yimten tsütsü pa ya Left Democratic Front (LDF) sapur ka liasü aser 1989 küm Thiruvananthapuram Lok Sabha election nung LDF nungi Congress candidate A. Charles den toktep saka takok mongutet.
Tesem tasen mesüra lokti tasen tentet nüngja ajak asoshi O.N.V. dangsa tama asüngdanga liasü.
Pa tang aremtsü aliba, state yimtiba Thiruvananthapuram nung sorkar meyong leper ‘Santhikavadam’ ya-a pai agütsüba tenüng lir.
Chief Minister Oommen Chandy-i, O.N.V. ji sangro zülur nisung ka aser pai nisung o lipoküm naprong kanga meim. Pa mapatem ajanga Malayalam oshi jenjang tajungba kümdaktsü, ta ashi.
Opposition lenir V.S. Achuthanandan-i, ni atema adianu ka aser linük asoshi nübur temeten atema nokdaker ka iba lima nungi pilaogo, ta ashi.
Kinüngertemi ashiba anogo nung state sorkari pa nem state rangben tenüng nung asüpila sentong ka katsütsü renema lir.