Item Lai tekong ya züngdangang aser temoatsü agiang

~ L. Ngangshi Jamir, Mokokchung Village.

Temeshi Laishiba nung Lipok kaket nungi Jungkai Adok kaket tashi Tapu-Tekong ajakji kasa dang tongtibang lir, saka tekong balala shia jagi lenmang balala aser nüngdak balala atema jembir. Anungji teküpboklen agüja aliba lai tekongtem ya-a khen züngdangdaktsünür.
(I)
1. Tsürabur temenen atema Ni par chirtem putu asem, pezü tashi merenshitsü. Anitet 20:5
2. Tsürabur tai atema chirnur dak, semchirsemnur dak putu asembuba aser pezübuba dak tashi mang ayanger. Anitet 34: 7 (b)
3. Ni sempaba tsürabur temenen yong par chirtem putu asem, pezü tashi merenshiba tenükmiba Tsüngrem Ni lir. Tazüngkunem 5: 9(b)
4. Tsüraburtemi tsükmenatsü tasen achi aser chirnur tepu mejemer. Yer 31: 29
5. Onok tsüraburtemi temenen mena aser joko mali aser onoki parnok tai temenen khu abener. Ayatai 5:7
Temeim külem tsüraburtem, asenoki asen sülen chirnur, semchisemnur tia indang mebilemdangi tanü asen ajung asa-a dang inyakrabang, libalirurabang Tsüngrem O nung ashi ama, asenoki aazüka yutsüba atakatemji asüng parnok dangi arulanglang. Tanga kibong aika nung chirnur-semchisemnurtem par tsüraburi bendena yutsüba atakatemji bener ayatai tia nung aliba asenoki ngudagi.
Kodanga meyazütetba Tsüngremer Tsüngchi O ya asenoki retreta agidi, sürabangla asen chirnur aser semchisemnurtemi alima senmang aser kotak senmang na prongla amangtettsü.
(II)
1. Tiyazü kuli memerenshii malitsü aser tiyazü jembirji mejenbutsü. Apijemtsü Shin 19: 5
2. Nai ne kiyonger anema tiyazü kuli teyi. Anitet 20:16
3. Tiyazü kuli memerenshii malitsü aser tiyazü jembirji samatsü. Apijemtsü Shin 19: 9
4. Tangar lendong madak pelarji memerenshii malitsü. Apijemtsü Shin 17: 5(b)
5. Nai tiyazü osang teprokshi aser tamajunger ka asoshi tiyazü kuli ajanga teyari. Anitet 23:1
6. Tamajung inyaktsü asoshi telok tuluba sülen nai tanidak. Anitet 23: 2
7. Azüh jangraba aser tekülak nisungi pei arishi küm tesadang-a malitsü. Tenüngsang ken 55: 23 (b)
Temeim Adianutem, tangar ka ludaktsütsü aser aidaktsünüdang asen sasa-a asen dak atakatem meteploktsü asoshi kanga shisa ka-a aser kümdanga lidi arung ta tazünger ajak ayongzüker.
III
1. Nai aniba ayanger nem ta-a magütsüi anepdang tashi teyu. Levi 19:13 (b)
2. Shirnoki ayangertem pei taa nung kangshir, amitsür aser lajar; aser shirnoki aener arua alir dang külak-kübonga benshir, aser ni metsübur, parnok anema ni tekara kuli asütsü ta Temeranger Kibubai ashir. Malaki 3:5 (b)
Asen mapa nung ayangertem nem taa shitak magütsüi aser agüjaka parnok nüngtak mapang shitak nung magütsüi asen ajung asaa suita yutsüra/doktsüra, lajamenjartem aser asen kidang yariteptsü asoshi ayubatem dang külak kübong mesüra maochii benshira asenok anema Kibubai O bendang tesashi lir ta meteta lidi.
IV
1. Nai narongjaker atakatem tesü mesüra nükpoker jakdang temetsüdaktsü meyutsütsüla; saka nai ne Tsüngrem tsübutsüla. Ni Kibuba lir. Levi 19:14
Asenoki narongjaker mezüngmeshia jembiaka parnoki mangshitsü, nükpoker metsüdaktsütsüsa mapa tamajung inyakaka parnoki mangutsü/majitettsü; aji saka parnok anüker aser phukümerji ajak angashisang aser ajak angusang tematiba Tsüngrem lir ta meteta asenoki aibelen masütsü kümdangdi.
2. Akhi arrtsü tagien; mesüra tebu malir alu jagi teyi. Kechiyong parnok Kümzüksangji tashi tait, na anema parnok asoshi Pai noktaktsü. A. shin 23: 10,11
Kimonglumong aser yokyasonü ajakji asen akümliwa mapang tatsüka atema ketdang asütsü melaba dang saka item ajakji Tsüngrem meyong, Pa dang tatem maka Kibur lir, anungji tsüraburi yutsüba arrtsü nung asen teka maitsüla.
Tebu malirtem, lajamenjartem, shirnoki Pei kimong lumong jangja-a memetet, arrtsüa memetet, metetaka parnoki asenok dang kecha meshitettsü aser meinyaktettsü ta bilema parnok kimonglumong nung asen teka maitsüla kechiaser parnok kümzüksangji tashi tait, aser asenok anema parnok asoshi Pai nokdaktsü ta Tsüngrem O-i asenok amokmerenbaji asenok asoshi senti O ta asenoki agizükdi.
V
1. Shiri Kibuba bushir parnok tajung kecha agia manüngtsü. T. Ken 34:10 (b)
2. Shirnoki Kibuba tsübur, parnok dak Kibuba temeim yimlibilemji tatem maka, aser Pa temeshibaji chirnur nungi chirnur tashi alitsü. T. Ken 103:17.
3. Tangbo ni tambur kümogo, saka kü lanuwa nungi temeshipur senzüka yutsüba ni mangu, mesüra par chirtem meshimetsüba ni monguka. T. Ken 37:25.
4. Nai Tsüngrem den temba yimang aser yimjung nung liang, yamaji asüba agi na azükarutsü. Yob 22:21.
5. Rasaba nungi anenang aser terasaba tokjang; tenemnem, ibajagi tamajung inyakleni dang anir. T. Ken 37:8.
6. Kibuba asoshi ata-ang aser pa lenmang nung liang, aser alima senmangji amangtsü asoshi pai na uludaktsütsü T. Ken 37:34.
7. Na temerük aser tindang lira; adangji pai na tepu akümtsü, aser ne temeshiba talidak shia agütsütsü. Na tila ka agi tenzükaka, na tesü-tatem nung jenti arentsü. Yob 8:6,7.
Tsüngrem O koba putusa putu jembiaka mejembir, kodanga tejen makümer, tagizüker ajak nem tekümtet agütsür, taküm tasen kümdaktsür, tashi tasen agütsür, shisatsü tasen agütsür, terajemba terajemba kümdaktsür, tanela nung takar kümdaktsür, iba taküm O asen temulungjang ajunga agi, tanela ajak agi meimdi, akangakanga azüitdi aser asen anogoshi taküm iba tsüngchi O nem anidaktsüdi arung ta tazünger ajak ayongzüker.