DDLSA-i National Lok Adalat ayonga agiogo

Dimapur, February 13 (TYO): Dimapur District Legal Services Authority (DDLSA)-i February 13, 2016 nü National Lok Adalat ayonga agiogo. Iba Adalat nung Bank dak sentakba ken o 23 tembanga jembi, ta DDLSA sangdong ka ajanga ashi.
Tan Lok Adalat ya DDLSA nung mendenbuba aser District & Sessions Judge, Neiko Kanuo-i lapoktsü.
Sangdong ajanga ashiba agi, iba Adalat nung mapang talangka atsünglangtsü aliba sen 20,56,692/- (Rupees twenty lakh fifty six thousand six hundred and ninety two) dak sentakba ken o tembanga jembi.
Lok Adalat ajanga mapang agia jembitsü aliba ken otem tem tangatettep tajung nung kara tembangtsür.
DDLSA-i Lok Adalat aika agiogo aser iba mapa nung ken o aika takok ngua tembangtsüogo.
Taruba Lok Adalat ji March 12, 2016 nü akatsü aser iba mapang Civil & Revenue aser Traffic & Banks dak sentakba nung obendangtsü.
Nüburtem ajaki iba maoangka agitsü ajungshir aser iba Adalat indang osang tejangja District Court building nung aliba DDLSA Front Office, Dimapur ajanga angutsü, ta kasa sangdong ajanga metetdaktsü.